Riddarinn á hest, ekki hvítan því miður en kolsvartan og gljáandi eðalreiðskjóta. Hann er léttur á fóðrum, því að þetta er hjólhestur. Agalega fínt eintak af gerðinni Cannondale F400. Með teinóttar gjarðir, fullt af gírum (gott ef að gripurinn er ekki með 24 ganga sem slær alveg út íslenska hestinn) og ekki hvað síst er þessi eðalreiðskjóti með alveg ótrúlegar og jafnvel óþarflega öflugar bremsur.
.
Það bar til einn góðviðris dag fyrir ekki svo ýkja löngu, að Riddarinn rauk úr rekkju, fyrir allar aldir, í snögga sturtu og út með Vakra Skjóna.
.
Þetta kom ekki til af góðu. Tóbaksbirgðir Riddarans höfðu klárast kveldinu áður og fyrir einskæra þrjósku, var tekið á karlmennskuni og látið sem ekkert hefði í skorist, Riddarinn kláraði bara sinn dag og fór að sofa.
.
En svo að við reynum nú að halda okkur frá Tarantynískri óreiðu í atburðarás og komum okkur aftur til baka í þar næstu málgrein á undan. Um morguninn var nikotín þörfin heldur betur farin að gera verulega vart við sig, Riddarinn var því snöggur út og Vakri Skjóni stiginn sem aldrei fyrr, í átt að næsta söluturni.
.
Segir lítið af ferðum Riddarans, þangað til fyrir utan söluturninn góða, en þannig var til háttað, fyrir framan þennan söluturninn, að allhá gangstéttarbrún var frá götunni upp á gangstéttina og hún um það bil það eina sem skildi að Riddarann og Tóbakið. Þannig að þarna var tekið enn frekar á og þetta var tekið á ferðinni.
.
Nú vil ég biðja ykkur lesendur góðir, að kveikja á þeirri frábæru innbyggðu sýningarvél, sem ímyndunaraflið hefur gefið okkur flestum.
.
Þarna kemur Riddarinn Tóbakslausi, hjólandi sem mest hann má, þvert á gangstéttarbrúnina háu, rífur laust í bremsuna fyrir afturhjólið sem venjulega gerir auðveldara að kippa reiðskjótanum upp að framan. NEMA HVAÐ!!!.
.
Þarna byrja hlutirnir að gerast býsna hratt, og í miðju glæsilegu flugi Riddarans yfir stýrið á Vakra Skjóna flugu hugsaninar í gegnum höfuðuð á honum í þessari röð.
(SHIT!! TÓK Í VITLAUSA BREMSU)+(REDDA ÞESSU, FER BARA Í HELJARSTÖKK YFIR STÝRIÐ OG LENDI Á LÖPPUNUM)+(SHIITTTT! BUXURNAR FASTAR Í HJÓLINU)+(SÉR EINS OG SÝNT HÆGT HENDURNAR RENNA EFTIR GANGSTÉTTINNI, SJÚKK ÞETTA REDDAST)+(SSHHIIITTT EIN GANGSTÉTTAR HELLAN STENDUR UPP ÚR)+(REYNIR AÐ LYFTA HENDINNI, GENGUR EKKI)+(ÚBBSSS! LITLI PUTTI KRÆKIST Í HELLUNA VONDU, ÁDS!)
.
Eftir að Riddarinn var búinn að losa sig úr flækjunni, staðinn upp, búin að líta til allra hliða hvort einhver vitni væru að atburðinum og særðu stolti Riddarans. Þá var rokið inn í söluturninn og öskrað TÓBAK.
.
Þarna var ung stúlka og maður að vinna, þau horfðu náföl á Riddarann skaklappast þarna inn, "er allt í lagi með þig sagði maðurinn" jæja þau höfðu þá séð þessa uppákomu......Tóbak EINSOGSKOT endurtók Riddarinn og setti hendurnar upp á borðið. Náfölnar þá stelpurófan aftur verður græn í framan og sígur með andvarpi í gólfið, það bara steinleið yfir hana.
.
Þarna varð Riddaranum litið á hendur sér og viti menn, var ekki litli putti bara alveg í vinkil um annan lið. Frekar óhugnarlegt á að líta. Riddarinn fékk tóbakið sitt og boð um að verða keyrður upp á slysavarðstofu. Skellti í sig einni rettu og þáði þetta kosta boð. Skellti í sig annari fyrir utan slysó og fór síðan inn.
.
Skemmst er frá að segja að þarna um þetta leiti, var náttúrulega deyfingin farin að dvína allverulega og verkurinn orðin mikið vondur. þegar læknirinn ætlaði að snerta litlaputta, var honum ráðið frá því eindregið, af Riddanum, svo fremi hann vildi lífi halda.
.
Læknirinn var frekar fljótur að átta sig á að þarna fylgdi hugur máli, eins og málum var komið og dældi deyfi og gleðilyfjum í Riddarann, sem mest hann mátti. Klukkutíma síðar félst Riddarinn á myndatöku og síðan um klukkutíma eftir það var puttanum kippt í lið, eða liði því bæði fremsti liður og miðliður fóru úr lið. Á þeim tímapunkti var Riddarinn svo dofinn og glaður að höggva hefði mátt af honum höndina við mjaðmalið. hahaha.
.
Boðskapur þessarar sögu er e-ð í sambandi við Tóbak, man bara ekki hvað.
.
.
.
Töfra Stundir.