Bókmentaverkið Gjafahandbók Hagkaupa er komið út á 87 blaðsíðum fyrir þessi jólin. Hér er á ferðinni nokkuð vandað rit, gefið út með mörgum litríkum myndum á glanspappír.

Í fyrstu grípur verkið mann hreðjatökum strax á forsíðu, en hún er prýdd mjög svo fögru fljóði. Á sömu forsíðu (það er bara ein forsíða í þessu riti) kemur svo skellurinn. Þar er fullyrt "þúsundir hugmynda af frábærum jólagjöfum" Lauslegur útreikningur minn gerir ráð fyrir að það þurfi a.m.k. tvær þúsundir til að hún standist, eða 22.99 frábæra humynd að jafnaði á blaðsíðu.
Handahófskendar stikkprufur leiða í ljós að þær eru mun færri að jafnaði. Það eitt og sér dregur stjörnugjöfuna þó nokkuð niður.

Söguþráðurinn er ekki sterkur, og afar ruglingslegur og erfitt að átta sig á honum. Persónum fer maður ekki að kynnast að gagni fyrr en á bls. 25 en þar held ég að það sé móðirin sem tekur vel klædd og brosandi á móti manni. Á næstu síðum virðast dætur hennar komast ínn í spilið, þær virðast vera frekar lauslátar, enda strax komnar á nærklæðin. Mikið er um upptalningar og tölur, og fær lesandinn fljótt á tilfinninguna að það sé verið að reyna selja honum eitthvað, eða í það minnstakosti að hafa af honum einhverja aura.

Ég gef þessu riti aðeins 2 stjörnur.
Glanspappírinn og lauslátu systurnar halda verkinu uppi af veikum mætti, en lélegur söguþráður og upptalningar vega fyrir mér of mikið til að spandera stjörnum.

--
Góðar stundir