Mér finnst gott að maula ís,
mikið fínt og gaman.
Mamma er sko í mussu úr flís,
mikið er það gaman.
Er annars að pæla í því hvort þetta „sko“ eigi kannski ekkert heima þarna. Það er náttúrulega danska.
Ég vil, að gefnu tilefni, minna á að síðustu forvöð til að senda jólakveðjur til annarra lífsstjarna eru kl. 10.30 í fyrramálið.
Athugið einnig að ekki verður tekið við fleiri kveðjum frá framliðnum. Kóbaltið er á þrotum á lager.
Snemma burt úr bænum skreið
búinn eftir þeysireið
kvaddi kráarsælu
loppinn hálstau leysti frá
listaskáldið kreisti þá
upp úr hálsi ælu
Ég horfði á afar fróðlegan þátt í norska ríkissjónvarpinu í fyrrakvöld um samanburðarrannsóknir á hripseiglu nælonregnhlífa. Stórkostleg norsk dagskrárgerð á heimsmælikvarða. AFHVERJU ERU EKKI SVONA ÞÆTTIR Á DAGSKRÁ RÚV? Hvurslags mannhatur er það eiginlega sem viðgengst hjá hinum háu herrum í Efstaleitinu? Á sama tíma var sýnd ömurleg áróðursmynd um brosmildi japanskra höfrunga sem skildi ekkert eftir sig nema hungurtilfinningu. Ég fór beinustu leið í 10-11 og keypti mér hrefnukjöt sem ég át hrátt og skolaði niður með G-mjólk.