Baggalútur

– Forystugrein –

Enter

Hvaða mölúldni og maðkétni óþverri hefur eiginlega fengið að viðgangast í þessari bann- og skuldsettu Orkuveitu okkar? Fordæmalaus óráðsía, gegndarlaust fimbulsvínarí og linnulaust gleðispreð með almannafé.

Fussumfokkingssvei.

Ég legg hér með til og mæli um að eigendur þessa útmigna sandkassa helstu gæludýra borgaryfirvalda, reki alla oföldu orkuboltana öfuga út úr þessu bruðlhýsi án tafar og komið þeim fyrir í látlausu húsnæði annars staðar í borginni. Það er t.d. ágætis hús á horni Suðurlandsbrautar og Gernsásvegar, sem gæti hentað starfseminni fullkomnlega.

Orkuhreiðrinu mætti svo gjarnan breyta í leikskóla – með heimsins stærsta boltalandi í anddyrinu.

1/9/10 • • Lesbók

Brjálað að gera

Jesús Kr. Jósepsson

Svakalega líður tíminn hratt. Nóvember bara að verða búinn. Brjálað að gera í lögfræðinni. Svo brjálað raunar að ég er að spá í að halda ekkert upp á afmælið mitt í ár.

26/11/07 •

• Þjóðblogg

Aumar heimtur

Hjálmar Jónsson frá Bólu

Aumleg fékk ég eyrnaskjól
ilmkerti og konfektstamp.
Helst þó þráði þessi jól
þokkalega sterkan hamp.

27/12/08 •

• Þjóðblogg

Tjörnin

Enter

Heyrið mig nú. Hvað er eiginlega með þessa Tjörn?

Á bara að taka því þegjandi og hljóðalaust að besta byggingarland borgarinnar liggi undir vatni?

Fólk er að væla yfir því að einhverjir örfoka melar uppi á heiðum séu á leiðinni undir vatn og svo liggur þessi daunilli drullupollur fyrir fótum manns alla daga, engum til ánægju nema brauðbelgdum vargfugli.

Þarna mætti nú aldeilis byggja eitthvað skemmtilegt. Tívolí til dæmis, bílabíó, hafnarboltavöll - eða kappakstursbraut.

Svo maður tali nú ekki um þann möguleika sem mér hugnast best, nefnilega að leggja þarna almennilega flugbraut - og flytja alþjóðaflugið í miðbæinn í eitt skipti fyrir öll.

Þá mætti í kjölfarið fylla Flugstöð Leifs Eiríkssonar af vatni og gera að veglegu sædýrasafni - með nægum bílastæðum.

4/9/06 • • Lesbók