Útgefandi kortsins er Styrktar- og líknarsjóður Oddfellowa, og framan á því er voðalega falleg mynd eftir Helga Sigurðsson. Innan í kortið er svo prentuð falleg jólakveðja:

Gleðilega jólahátíð
heillaríkt komandi ár

Megi ljós og friður
lifa með okkur öllum.

Við þetta hef ég ekkert að athuga, kveðjan er alltént skárri en þetta venjulega gleðileg-jól-og-farsælt-komandi-kjaftæði.
Vandinn liggur í átta stuttum línum sem prentaðar eru í efra vinstra horn kortsins;

Jólaklukkur klingja
komið heilagt kvöld;
barnaraddir syngja
boðskap Guðs í kvöld.
Hér á helgum tíðum
hugsum vér til þín.
Barns í augum blíðum
blikar saklaus sýn.

Þarna hrukkum við mæðgurnar við. Hvílík hörmung! Höfundur er nafngreindur, og til að vera nú viss um að ég færi ekki að skíta yfir fyrstu tilraunir einhvers krakkagemlings, fletti ég nafninu upp í Íslendingabók. Reyndist einungis einn einstaklingur bera þetta nafn, og er sá kominn yfir fimmtugt, svo varla er hægt að kenna reynsluleysi um þetta. Finnst mér að þeir sem sjá um að velja innihald í þessi kort gætu gert betur en þetta. Ef ekki finnst sæmilega samanbögglað ljóðakorn, má alltaf leita í smiðju þjóðskáldanna. Frekar vil ég fá jólakort með sígildu jólaljóði, en svona leirburð, þó hann hafi ekki birst áður á prenti.

Jólakort Oddfellowa fær eina stjörnu fyrir kveðjuna.
---

Út frá þessu fór ég að vafra um síðu Oddfellowa á Íslandi.
Markmið Oddfellow-reglunnar er, samkvæmt síðunni, að gera félaga hennar að betri mönnum. Tekið er fram að ekki séu rædd stjórnmál eða trúmál á fundum, þar sem slíkt ali á misklíð. Hinsvegar má annarsstaðar á síðunni finna þessi orð;

"Allt innra starf Reglunnar byggir á vestrænni siðfræði og því er Oddfellowreglan einnig mannræktarsamtök í þess orðs fyllstu merkingu. Enginn getur gerst félagi Reglunnar nema hann trúi á eina æðstu veru sem skapað hefir heiminn og heldur honum við."

Er það rétt skilið hjá mér að Oddfellow-reglan geri þá kröfu til félaga að þeir séu trúaðir, en minnist ekki á það á fundum? Af uppsetningu þessarra staðhæfinga dreg ég þá ályktun að þeir ætli þau okkar sem ekki játa trú á "eina æðstu veru" siðlaus, og þar af leiðandi óhæf til inngöngu í þennan annars ágæta klúbb.