Fyrir helgi ákvað ég að skipta um þjónustuaðila vegna internettengingar minnar. Farið var á fimmtudag og pöntuð ADSL 6000 hjá Símanum, þar sem að gamla 2000 tengingin mín bar ekki netnotkun mína nógu vel.

Í verslun Símans í Smáralind tók á móti mér afar geðþekk og kurteis ung kona sem skráði óskir mínar um nettengingu og sjónvarpsákrift í tölvukerfi fyrirtækisins. Hún tjáði mér það að hún myndi sjá um að segja upp gömlu áskriftinni sem var hjá ónefndri netþjónustu og að ég myndi verða netlaus í mesta lagi 2-3 klukkutíma. Nýja tengingin myndi svo fara í gang eftir 6 daga.
Ég yfirgaf verslunina með Svefneyjarglott.

Þá fyrst byrjaði ballið. Á föstudaginn fór fyrri þjónustuveitandi í fýlu og lokaði aðgangi mínum að internetinu ásamt því að fjarlæga ADSL merkið af símalínunni.
Þar sem að ég hafði nóg að gera gerði ég ekkert í því fyrr en í dag.
Ég hringdi í Símann og spurði hvað væri hægt að gera í þessu.
Maðurinn sem varð fyrir svörum tók sig til og stofnaði notendanafn og tengdi mig strax, þannig núna 15 mínútum seinna er ég nettengdur, sæll og glaður.

Síminn fær mínar bestu þakkir fyrir snör viðbrögð og liðlegheit...

Ég skora á önnur fyrirtæki í sama geira að taka sér til fyrirmyndar, þetta góða fólk sem ég átti samskipti við í þessum hremmingum.

Góðar stundir.