Heilsuleysi mitt er ekki til eftirbreytni.
Hér ligg ég sem larfur í bæli,
löðrandi sveittur og hrakinn.
Heltekinn vesaldarvæli,
varnarlaus andlega nakinn.
Því vírusar hafa virkjað minn kropp
og vísast þar halda nú fund.
Ég ælt hef og drullað í kirnu og kopp,
klárlega bæði, um stund.
Úr vitunum lekur, slefa og slubb,
sláttur í hlustunum dunar.
Ég missi í sængina saurmeingað gubb,
samfellt því hvort tveggja bunar.
Já svona er heilsan, ég segi það satt,
sumum þó finnist ég vílinn.
Því kjökur mitt yrði svo andskoti flatt,
án þess að færa í stílinn.
Ákavíti sótthreinsar meltingarfærin, gefur hraustlegt og gott útlit. Gott að sjá að rímstöðvarnar hafa þó sloppið óskaddaðar frá ósköjpunum.
Hættu þessu væli og fáðu þér Ákavítisblandað lýsi... annars er þetta frábært hjá þér karlinn minn... skál
Fátt er svo með öllu illt - tildæmis þetta pestarkast, að eigi komi nokkuð gott útúr því - tildæmis þessi skemmtilegi sálmur.