Ágætu Bagglýtingar
Það er dagur syndaaflausnar, hvort sem menn fá fyrirgefningu eður ei.
Í framhaldi af félagsriti Haraldar Austmanns sendi ég honum eftirfarandi einkapóst. Svo virðist að athugasemd sem ég setti inn á þráð hér hafi ásamt einkapósti frá Ívari hafa orðið til þess að hrekja Harald héðan. Ég vil taka það skýrt fram að ég reikna með að hann einn hafi skilið umrædda athugasemd og að hún var algerlega laus við illkvittni eða að vera að öðru leyti illa meint.

Sæll Haraldur
Mig langar að biðja þig formlega afsökunar á því frumhlaupi mínu og dómgreindarskorti að setja inn á Gestapó tilvísun þá sem þú vísar til í félagsriti þínu. Mér er ekki ljóst hvers vegna í ósöpunum ég gerði það, en sé nú sárt eftir því enda vil ég ekki standa í illindum eða særa fólk sem ekkert hefur til þess unnið.
Svo ég reki það hvernig ég tel mig hafa komist að "ætterni" Haraldar Austmanns, þá er fyrst til þess að taka að ég er maður ákaflega forvitinn og eftir að ég fór að gera mig heimakominn á Baggalút, vakti persóna Austmanns og þá mannssins á bak við hann, umrædda forvitni, langt umfram aðra þar.
Þannig er að ég er innfæddur Austfirðingur, gekk hér í menntaskóla, hef búið og/eða unnið á ........., samtals 8 þéttbýliskjörnum hér austan lands. Ég tel mig þekkja mjög stóran hluta Austfirðinga og fékk fljótlega þá flugu í höfuðið að meiri líkur væru fyrir því en minni að H Austmann væri í kunningjahópi mínum í kjötheimum. Í haust lét ég mig hafa það þegar ég var staddur í bænum að kíkja á "hitting" sem haldinn var á Grand Rock. Þar mættu líkast til milli 20 og 30 Bagglýtingar og var samkoman ágæt. Mér kom frekar á óvart að kannast þar ekki við nokkurn mann, en hefði etv þekkt einhvern ef yngri kynslóðin hefði komið í fylgd foreldra sinna. Þarna rabbaði ég við ýmsa góða og gegna Bagglýtinga og þar á meðal einhverja sem verið höfðu á fyrri hittingum. Að sjálfsögðu spjölluðum við um fjarstödd fyrirmenni og spurði ég einn ráðsettan um Austfjarðagoðann H Austmann og sagðist sá halda að í kjötheimum væri hann .....(starfsheiti).
Það laukst síðan allt í einu upp fyrir mér ....... að hann hefði örugglega rétt fyrir sér, tengingin væri ........ . Það var alls ekki meining mín að "afhjúpa" Harald eða reiknaði ég með því að nokkur nema þú, (ef tilgátan væri rétt) myndir skilja athugasemdina.
Ég held að Hlewgastr hafi í raun hitt naglann á höfuðið varðandi þetta stórmerkilega samfélag sem þróaðist á Gestapó að hittingar í kjötheimum myndu ríða því að fullu. Í það minnsta hefur sígið hratt á ógæfuhliðana þar.
Ég vil að endingu biðjast afsökunar aftur og þakka þér afar skemmtileg samskipti og huggulega viðkynningu á Lútnum. Það þarf vitanlega ekki að segja þér að þín verður sárt saknað á Baggalút, enda hefurðu verið einn alskemmtilegasti penninn þar.
Sjálfur hef ég dregið mjög úr heimsóknum þangað upp á síðkastið enda hún Snorrabúð stekkur.
Með kveðju,
Golíat
alias ............

Frá mínum bæjardyrum var þetta spurningin um hvort menn vildu þekkjast innan þessa hóps eða ekki og ég hafði vitneskju um að Haraldur hafði mætti á hittinga Bagglýtinga og þannig gefið það til kynna að hann tæki það ekki alvarlega þó einhver okkar þekkti hann út ketheimum. Ég hafði hins vegar enga hugmynd um póst Ívars og tek fram að við Ívar höfum aldrei rætt þetta mál eða önnur viðkomandi persónum á bak við alteregóin hér.

Að endingu kveð ég ykkur kæru Bagglýtingar og bið ykkur afsökunar á því að hafa með vanhugsuðum athöfnum orðið til að hrekja einn okkar besta félaga héðan.
Með von um að andinn hér nái fyrri hæðum sem fyrst.
Golíat