— GESTAPÓ —
Urmull_Ergis
Nýgræðingur.
Pistlingur - 1/12/05
Megawött

Meira og meira.

-Þar sem ég sit hérna eineygður og makindalegur við eldhúsgluggann heima hjá mér og hrósa happi yfir því að vera bara fífl, datt mér í hug að setja nokkrar glópslegar hugsanir á blað.

-Það hefur vakið furðu mína upp á síðkastið að umhverfisfrömuðir skuli hvorki hósta né stynja þó verið sé að virkja fyrir 120 milljarða í túnfæti Reykjavíkur. Veruleikinn er sá að Hellisheiðarvirkjun mun kosta um 120 milljarða við verklok 2011 ef ítrustu hugmyndir ganga eftir, og framleiða um 550 megavött af rafmagni. Það er um 140 megawöttum minna en Kárahnjúkavirkjun. Munurinn er ein Sigölduvirkjun, svona hér um bil.

-Hellisheiðin verður útboruð eins og svissneskur ostur, og það munu liggja þarna vegir, gufulagnir og línur þvers og kruss. Holur verða boraðar frá Hverahlíð í suðri til Kýrgils í norðri og að Hellisgili í vestri. Að hverju borplani mun liggja vegur.

-Ég er svosem enginn sérstakur náttúruverndarsinni, og hef ætið hrifist af stórhug og framkvæmdasemi. Þetta svæði er hinsvegar um margt merkilegt, um Hellisheiði liggur og lá fjölfarinn þjóðleið. Gamla þjóðleiðin var vörðuð með um 100 vörðum, og frá Lækjarbotnum og að Reykjum í Ölfusi voru þegar mest var 4 sæluhús. Þessi sæluhús voru við Fóvellutjarnir, Húsmúla, Kolviðarhól og Hellukofinn á Hellisheiði. Eins og allir vita er Þingvallaþjóðgarður hinum meginn við Hengilinn og hluti þjóðgarðsins er á heimsmynjaskrá UNESCO. Með öðrum orðum þá er þetta talið dáldið merkilegt svæði.

-Um þetta svæði er endalaus umferð, og um helgar streyma borgarbúar út á þetta svæði og djöflast þarna á vélsleðum og mótorhjólum sem er harla gott. Því ekki má orðið hreyfa sig innan borgarmarka. Líkur eru á að þetta svæði verði eitt af helstu útivistarsvæðum borgarbúa þegar fram líða stundir. Nú þegar eru á þessu svæði tvö línustæði annað 220 kílówött og hitt er 440 kílówött.
-Ég get ekki varist þeirri hugsun að í nánustu framtíð munu hagsmunir orkuframleiðslu og útivistar rekast á á þessu svæði.

-En allt er þetta harla gott þegar tekið er tillit til þess að stór hluti vinnuafls þarna uppfrá er af erlendum uppruna að leggja drög að orkuframleiðslu fyrir erlenda stóriðju.

   (4 af 23)  
1/12/05 16:01

fagri

Sennilega er þetta allt gert til að gjaldeyristekjur framtíðarinnar standi undir snjósleða og jeppaæði borgarbúa. Ég held að það sé plottið.
En að sjálfsögðu er slæmt að þurfa að flatreka framhjá borholu eða nauðhemla við mastur á Artic Cat sleðanum eða Artic Trucks jeppanum.

1/12/05 16:01

Poxxx

Milljón megakíló!

1/12/05 16:01

B. Ewing

Í meginatriðum er ég sammála. Einn stór munur er þó á þessum tveim virkjunum (af mörgum). Á Hellisheiði má eftir xxx mörg ár pakka saman og fara án þess að skilið sé eftir stórt flæmi af drullu og leðju auk þess sem heill dalur hverfur ekki undir sama efni. Þannig væri hægt að ná tilbaka um 95% af náttúrufegurðinni aftur. Helstu merkin sem stæðu eftir væru aðalvegirnir og ef borholurnar hafa ekki annaðhvort fallið saman eða misst afl þá stæði einn jarðgufuventill sirka 2 metra uppúr jörðinni. við hverja holu. Vegslóða og hús er hægt að rífa og fjarlægja nær öll ummerki um veru þess.
Kárahnjúkar eru hinsvegar allt annars eðlis. Eftir 100 ár þegar stífluna verður ekki lengur hægt að virkja (vegna aur og drullu) þá stendur eftir ónothæfur 3 og hálfrar Hallgrímskirkju steypuveggur sem engin leið er að fjarlægja.

Þetta er töluverð einföldun en staðreynd engu að síður.

1/12/05 16:01

Urmull_Ergis

-Satt best að segja þá snýst þetta ekki um hvort þetta er gott eða slæmt, heldur hversvegna umhverfisgúrú landsins hafi ekkert um þetta að segja, þögn þeirra er í sjálfu sér merkileg.

1/12/05 16:01

B. Ewing

Ekki veit ég hversvegna umhverfisgúrúar segja ekkert við Hellisheiðarvirkjun.

Sjálfur hef ég þó ekið um byggingasvæðið þar og skoðað mig um. Að sjálfsögðu er þarna afar stór framkvæmd í gangi og margt sem virðist vera fullstórt í sniðum en er sagt nauðsyn, ekki get ég dæmt um það. Ekki hef ég komið á Kárahnjúkastíflu, hvorki fyrir né eftir upphaf framkvæmda þar svo engann á ég samanburðinn.

Ég hygg að lítið sé sagt við Hellisheiðarvirkjun vegna þess að umhverfið, lífríkið og annað á svæðinu býður ekki varanlegan skaða. Svo spila örugglega inní sjónarmiðið Arðsemi vs. Umhverfissjónarmið.
Án þess að hafa kynnt mér þetta þá hefði ég haldið að A vs. U sé einhvernvegin svona fyrir hvorn stað:

Hellisheiði:
A -> Nokkuð góð og örugg.
U->Áhrif í meðallagi, en afturkræf að mestu.

Kárahnjúkar:
A-> Lítil, ekki öruggt hvort aðrsemi verði yfirhöfuð (einn kúnni sem gæti bara lokað sjoppunni og farið þegar hentar)
U-> Mikil, nær alveg óafturkræf

Svo vantar mig alveg að vita endinguna á Hellisheiðavirkjuninni, Kárahnjúkavirkjun er ónýt eftir 100 ár hinsvegar.

Framtíðarútivistarsvæði á þessum stað yrði frábær hugmynd enda hefur fólk verið að fara þarna um í allmörg ár. Einnig heyrði ég hugmyndir um að gera Botnssúlur að framtíðarskíðasvæði Reykjavíkur enda með eindæmum góðar brekkur og góð snjósöfnun í hlíðunum þar.
Svo minnti mig að eitt af skilyrðunum fyrir Nesjavallavirkjun í upphafi var að merkja, halda við og veita upplýsingar um gönguleiðir og fornar þjóðleiðir í nágrenninu, vona að það sé ekki misminni.

1/12/05 16:01

Jóakim Aðalönd

Hmmm...

Heldur þú B. að ekki sé hægt að koma í veg fyrir að Kárahnjúkavirkjun verði ónýt eftir 100 ár? Hvaðan hefur þú þessar upplýsingar? Það er líka staðreynd að gufuaflsvirkjanir spúa út úr sér talsverðu af mengandi efnum. Það er hins vegar rétt að umhverfisáhrif eru miklu minni en af vatnsaflsvirkjunum.

Þú talar um að arðsemi Hellisheiðarvirkjunar sé góð og örugg. Hver er kúnninn þar? Auk þess eru líkurnar á að kúnni Kárahnjúkavirkjunar muni pakka saman og fara, ansi litlar. Þeir færu varla að fara út í svona fjárfestingu til þess svo að hætta við allt saman.

Ég vil virkja sem mest. Ég er tilbúinn að fórna miklu, þýði það nógu mikinn pening í kassann. Kannske ekki Gullfossi eða öðrum merkilegum náttúrufyrirbrigðum, en talsvert miklu samt.

1/12/05 16:02

B. Ewing

Ég er ekki neinn sérfræðingur í þessum málum og hef lítið getað (og nennt) að fyrlgjast með þessu.
Það sem mér skilst er að sá jökulleir sem áin þarna ber með sér er nægur að magni til að barmafylla lónið á 100 árum. Engin getur virkjað lón fullt af leir svo þannig verður virkjunin ónýt, allavegana þarf þá að fara út í að dæla og flytja burtu allan þennan leir.
Ég leit aðeins inn á síðu OR sem gerir Hellisheiðarvirkjun til að reyna að kynna mér í hvað orkan og vatnið á að fara http://www.or.is/Forsida/Hellisheidarvirkjun/
Sýnist mér einna helst að þessu verði bætt á almenna raforkukerfið svo að einhverjir munu nota þetta.

1/12/05 16:02

Offari

Þessi náttúrudýrkun er undarlegt fyrirbæri, menn öskra hástöfum yfir framkvæmdum á stöðum sem að varla nokkur hefur séð. Kárahnjúkar voru ekki til fyrir 30 árum, nema í huga örfárra bænda sem þurftu að smala þar. Það er tóm heimska að leyfa þessum jökulfljótum að renna óvirkjuð til sjáfar. Hvað varðar það land er sekkur við svona stórvirki vil ég benda á að við erum bara að nýta örlítið brot af landinu , og tölvert magn af ósnertri náttúru verður afgangs. Jarðvarminn er mun áhættusamari fjárfesting, þar virkja menn á jarðskjálftasvæðum, sem þíðir að tölvert óöryggi er um þá framleiðslu. Því sagði enginn neitt þegar menn fóru að taka upp á því að reisa hús í Reykjavík?, Þvílík spilling var á þeirri náttúru. Var ekkert umhverfismat gert þá?

1/12/05 17:00

Lopi

Ég spái því að það verði hryllingur að aka yfir Hellisheiðinia eftir 10 ár. Þá munum við ekki sjá fallegur fjöllin fyrir þessum ljótu virkjanabyggingum og túristar sem koma higað segja: Skelfing er þetta ljótt land, allt morandi af virkjunum og verksmiðjum. Hingað ætla ég aldrei að koma aftur!

1/12/05 17:01

Sæmi Fróði

Ég hef nú meiri áhyggjur af öðru, en það er bara ég.

1/12/05 17:01

Jóakim Aðalönd

Jamm, sama segi ég. Svo ég haldi aðeins áfram með leirburð (haha), þá er svipað uppi á teningnum í Bjarnalóni við Búrfellsvirkjun (í minni sveit). Þar ógnar sandframburður lóninu, en sandinum er einfaldlega dælt í burtu af botninum. Ég trúi varla öðru en að það verði hægt við Kárahnjúka líka og grunar mig að þessi áróður um að Kárahnjúkavirkjun verði ónýt á 100 árum sé frá náttúruverndarsinnum til að kasta rýrð á verkefnið, sem mun vissulega skila heilu bílförmunum af peningi inn í íslenzkt efnahagskerfi.

Urmull_Ergis:
  • Fæðing hér: 13/9/03 10:15
  • Síðast á ferli: 5/2/12 21:25
  • Innlegg: 2
Eðli:
-Af fágætri tegund gabbapa, sem eiga uppruna sinn á Súmötru. Skottlausir, en vel vaxnir niður, grænleitir, skapstyggir, matfrekir og málóðir.
-Listelskir og sístarfandi. Öpum þessum hættir til nymphomaniu og ofdrykkju.
Fræðasvið:
-Umhverfisalfræði. -Fjöldi skrifaðra vísindagreina um gulrætur, auk tímamótaritraðarinnar Rollur sem gæludýr.
Æviágrip:
-Minnisleysi einkennir gabbapa, því lifa þeir við þann misskilning að þeir séu nýfæddir á hverjum degi. Því eru æviágrip óþekkt meðal þeirra.