Álsaga handa börnum.

Don Krull, Dr.Álmann og Vatnar Rafmann hittust yfir kaffi, það var um það leiti sem allt var vont á Íslandi. –Fólkið var dreyft um allt landið og voðalega vont að hafa einhverja yfirsýn yfir hvað fólkið var að gera.

Don Krull var ekki ánægður með þetta.. –Við þurfum að breyta þessu sagði hann.
Já, sei sei, það er nú aldeilis gott að vera með álver sagði Dr. Álmann og fékk sér sopa af kaffinu sínu. Don Krull og Vatnar Rafmann urðu nú aldeilis forvitnir.
-Já, sko útlendingar vilja kaupa ál, þeir nota það í álpappír, flugvélar, bíla og mjög marga fína hluti. Eiginlega eru allir almennilegir hlutir úr áli sagði Dr. Álmann.

Don Krull varð hugsi, kostar ál mikla peninga, spurði hann Dr. Álmann. –Já maður, það kostar helling. Þarf ekki álver til þess að búa til ál spurði Don Krull? Jú, best er að eiga hrikalega stórt álver helst mörg svoleiðis. Álver þarf rafmagn sagði Vatnar Rafmann, svakalega mikið rafmagn. Issss...við getum alveg búið til rafmagn sagði Don Krull.

Nú fékk Vatnar Rafmann sér smá brennivín saman við kaffið, og sagði við Don Krull, ég er búinn að vera heima hjá mér á kvöldin að teikna stíflu og rafstöð. Sjáðu til, það er fullt af sprænum upp á fjöllum sem renna bara eitthvað út í loftið. –Ég er búinn að sjá leið til að láta þær renna allar á sama stað í risastórt lón, og úr þessu lóni í rafstöðina.
-Það er samt smávegis að þessu, sagði Vatnar Rafmann.

Nú hvað er það spurði Don Krull. Þetta kostar ógeðslega mikla peninga, og ég þarf eiginlega að láta búa til feiknalega stóra stíflu, sagði Vatnar Rafmann. Er þetta ekki flott stífla spurði Don Krull, júhú mér finnst hún sko flott sagði Vatnar Rafmann.
-Nú dró Dr.Álmann blað með reiknisdæmi úr töskunni sinni og sagði við Don Krull, sko mér sýnist þetta kosta einn og hálfan triljarð og þetta verður orðið ónýtt eftir 150 ár, og búið að borga sig 15 sinnum þá.

Þetta er alveg frábært sagði Don Krull þá verðum við öll rík, en steindauð þegar þetta verður orðið ónýtt. Kannski ég hringi bara í vin minn á Ítalíu, Don Inferior hann kippir þessu örugglega í liðinn fyrir okkur.
-En Don Krull þú veist að Don Inferior er frægur skítbuxi sagði Vatnar Rafmann. Hann pönkast á þeim sem vinna hjá honum og brýtur allar reglur í þeim löndum sem hann kemur til.

Hva, er þessi stífla ekki uppi á fjöllum, við náttúrulega getum ekkert verið að setja út á það sem við sjáum ekki. Svo fáum við líka í staðinn fullt af peningum, sagði Don Krull og tók upp farsímann sinn um leið og hann dreypti á Bermúda brennivíninu sínu.

-Vatnar Rafmann horfði dreyminn á Dr Álmann sem blaðaði í skjalatöskunni sinni og leitaði að nýju leikjatölvunni sinni.