Sósusálmur

Sósurnar streyma sunnanað
sósurnar trítla norðanað
sósurnar labba austanað
sósurnar ærslast vestanað

Sósurnar brjótast utanað
sósurnar bulla upp innanað
sósurnar falla ofanað
sósurnar læðast neðanað.

Sósurnar æxlast allstaðar
allri mannkind til bölvunar
öllum um stund til ununar
öllum þó lokst til þjáningar.

Tak frá mér Guð allt sósusull
seyddar steikur og þvílíkt drull.
Gef mér á minn græna disk
grautarsleikju og úldinn fisk.

Þetta orti Þórbergur Þórðarson. Hann á stórafmæli um þessar mundir. Ætlun hans, að berjast á móti útlenzkum áhrifum (þ.e. sósuneyzlu) mistókst. Nú etur hver Íslendingur eitthvað útlenzkt í hvert mál.
Að sama skapi ætla ég með það sama (svo maður sletti dönsku) að reyna einnig; án árangurs að berjast mót útlenzkum áhrifum.

Tilbrigði við stef:

Tölvurnar æða tvist og bast
tölvurnar hirð'ei um lof né last
tölvurnar ana til og frá
tölvurnar eyða hýrri brá.

Tölvurnar hárin gera grá
gögnin týnd og engum hjá.
Öllum til ergis og bölvunar
eru þær helvítis tölvurnar.

Hafa má af þeim hjálp um skeið
svo hirða þær gleði'og valda neyð.
Tölvurnar auka í taugum pain,
tæra sálu og skapa mein.

Nem frá mér Guð öll tölvutól
tengdar neti og knúnar sól.
Færðu mér heldur fjaðurstaf,
fúið skinn og sagnahaf.