Óskarsakademíunni eigi alls varnað
Loksins kom eitthvað af viti frá þessari annars skyni skroppnu Óskarsakademíu. Stórvirki Peters Jacksons var reyndar þegar orðið ódauðlegt og Óskarinn því einungis punkturinn yfir i-ið. Hefði akademían hins vegar viljað tryggja nýliðinni Óskarshátíð stóran sess (á neikvæðan hátt) í sögunni og verða sjálfri sér um leið til ævarandi skammar hefði hún gert eitthvað annað en það sem hún loksins hunskaðist til að gera.
Því þó seint sé þá viljum vér nefna að ROTK er einhver sú stórfenglegasta og besta mynd er vér höfum um ævina séð ef ekki sú allra besta. Þarna er listilega fléttað saman stórfenglegustu bardagaatriðum er sést hafa á hvíta tjaldinu, þjáningum Frodos á leið upp eldfjallið með hringinn ásamt Sam og hinum undirförula, klofna persónuleika Gollum, og mörgu, mörgu öðru sem of langt mál væri að telja upp hér. Allt þetta í mynd sem er vel yfir 3 klst. en sá tími er fljótur að líða.
Tvær stjörnur af fimm til akademíunnar fyrir að drattast loksins til að gera eitthvað af viti. Stjörnurnar þrjár er á vantar eru refsing fyrir oft á tíðum stórundarlegar ákvarðanir gegnum árin (ROTK fengi hinsvegar 6 stjörnur af 5 mögulegum ef stjörnugjöfin snerist um hana).