Árshátíð Baggalúts 2005. Hvað á maður svosem að segja? Orð fá varla lýst hvernig tilfinningin var að ganga inn á Sportbar.is, en ég reyni samt.

Auðvitað var maður stressaður, að fara að hitta allt þetta fólk á einum stað. Ég og Kanínan komum fyrstar, eins og raunar var búist við, enda vildum við vera þarna eins lengi og mögulegt var. Eini Bagglýtinginn sem var mættur var vitaskuld Heiðglyrnir sem bauð okkur velkomnar og skenkti okkur úrvals malt og kók í glös. Eftir fáeinar mínútur kom Enter sjálfur og afhenti okkur nafnspjöld og ljósbláa efnisskrá.

Með tímanum fór fólkið að tínast inn, RokkMús, Hóras og Frelli, restin af ritstjórn og margir fleiri. Rætt var um framtíð Undirheima, ritstjórnin vann ungmennafélagið(naumlega) í pool og nokkur maltglös hurfu á undarlegan hátt.

Fjörið byrjaði þegar einhver óþekktur hafði klárað mestallt maltið á Sportbar.is. Ritstjórn tókst að koma tölvugarminum í gang, og áhugaverð glærusýning hófst um sögu og framtíðaráætlanir Baggalúts. En þegar komið var langt fram yfir háttatíma lítilla furðudýra og kanína kom ósvífinn afbæjarmaður og krafðist þess að fyrrnefnd furðudýr kæmu með honum heim. Samningarviðræður hófust, og þá kom sér vel að vera meistari í þeim fræðum. Við fengum að vera aðeins lengur. Hóras hélt ræðuna sína, sem var auðvitað frábær þrátt fyrir að vera spunnin mestöll á staðnum, og eftir það þurftu litlu lömbin að fara heim í háttinn. Afbæjarmaðurinn lét ekki plata sig tvisvar og togaði okkur nærri því út á eyrnasneplunum, en við náðum blessunarlega að kveðja sem flesta.

Þess má geta að enginn sogaðist í Skrumgleypinn sem var grunaður um að hafa komið sér fyrir í klósettinu á Sportbar.is, svo að ég viti til.

Sérstakar þakkir fær öðlingurinn Heiðglyrnir fyrir að hýsa árshátíðina á flottum stað, og þola þetta endalausa maltþamb í mér. Auðvitað fær ritstjórnin þakkir fyrir yndislega árshátíð. Þakkir fá Bagglýtingjar fyrir að halda uppi góðu fjöri(sem magnaðist líklega eftir að við unga fólkið fórum) og fyrir að vera alltaf jafn frábært fólk.

Árshátíð Baggalúts 2005 fær auðvitað fimm stjörnur frá mér.
Takk fyrir, og sjáumst vonandi öll aftur á næsta ári.