Adak er eyja sunnarlega í Aleuta eyjaklasanum. Búa þar um 37 alkohólistar (enginn þeirra leigubílstjóri - sjá fyrra félagsrit), auk nokkur hundruð farandverkamanna, enda er þar gríðarlega stór fiskverksmiðja, reyndar ein stærsta sinnar tegundar í Bandaríkjunum. En Adak var eitt sinn töluvert stærra bæjarfélag. Er þar húsakostur fyrir yfir 6000 manns, enda var Adak herstöð á stærð við “varnar” stöðina á Miðnesheiði. En líkt og á Miðnesheiði, þá er nú hún Snorrabúð stekkur, eins og sumir segja. Herinn ákvað í sparnaðarskyni að leggja þessa einangruðu stöð niður. Og það var nákvæmlega, eða þannig, sem hann gerði árið 1997. Hurðunum var bara lokað, hermennirnir settust upp í flugvél og héldu til annara starfa. Allt var skilið eftir. Undir hluta af varnarsvæðinu er gríðarstór neðanjarðarbyrgi. Þar inni er allt til alls. Bar, sundlaug, sjónvarps- og útvarpsstöð, íþróttasalur (með öllum tækjum ennþá í) allrahanda skrifstofur, bíó, keilusalur, bókasafn og svo náttúrulega fjarskiptastöð. Fjarskiptatækin voru þau einu sem að voru fjarlægð. Allt annað var hreinlega skilið eftir. Þegar ég labbaði þarna um bókasafnið þá var náttúrulega búið að ganga berserksgang um allt, brjóta og bramla og velta bókahillunum um koll. En bækurnar voru þarna ennþá. Ég rakst á Encyclopedia Britannica, 12 binda safn en gallinn var bara sá að ég gat ómögulega fundið fimmta bindið, annars hefði ég fjarlægt stóran hluta af fötunum mínum og tekið það með mér.

Þetta var bara sorglegt.

En þarna átti sér stað furðulegt ferli. Allt var skilið eftir. Bílar, snjóruðningstæki, lampar, rúm, ísskápar, það var bara labbað í burtu. Og nú, tíu árum seinna er allt að hruni komið. Sama ár og ákvörðun var tekin um að yfirgefa þessa herstöð, þá voru kláraðar framkvæmdir við sjúkrahús og tvo skóla. Samanlagður kostnaður? Með þriðja skólanum, sem hafði verið smíðaður tveimur árum áður, yfir eitt hundrað milljónir dollara.

Þetta kemur manni til að hugsa. Ástæðan fyrir því að þetta var allt skilið eftir er sú, að hernaðaryfirvöld ákváðu að það væri dýrara að fjarlægja dótið heldur en kaupa nýtt. Ég er nú reyndar svo mikill sveitamaður í mér að ég skil ekki þessa hagfræði. Fyrir mér þá eru verðmæti verðmæti, ekki óþarfi sem má henda. Ég veit að það kostar að flytja hluti, en kommon!

Ef þið viljið sjá myndir þá eru þær á http://www.123.is/album/display.aspx?fn=rattati&aid=931123964
Reyndar eru þær í dálítið flókinni röð, en ég reyndi að setja skýringartexta við flestar.

Ég er ennþá dálítið hugsi yfir þessari ferð. Guði sé lof að Íslenskir stjórnmálamenn hafi ekki yfir þessum fjármunum að ráða. Þeim gengur ekki of vel með þessar fáu krónur sem þeir hafa til ráðstöfunar.

Frekari upplýsingar er hægt að fá á http://en.wikipedia.org/wiki/Adak,_Alaska gallinn er bara sá að það eru villur þar, en ekki mjög mikilvægar.