Þau miklu tíðindi hafa nú gerst í Baggalútíu að ég hef verið valinn til að gegna embætti KEISARA. Ég á ekki nógu sterk orð til að lýsa þakklæti mínu. Ég get þó ekki látið hjá líða að þakka keisaraynjunni Krumpu fyrir að hafa valið mig. Auk þess þakka ég þeim fjölmörgu þegnum Baggalútíu, sem studdu mig til þessa háa embættis.

Ekki veit ég hvað varð til þess að Mikill Hákon og varakeisari hans Hilmar harðjaxl hurfu á braut, en víst er að keisaraembættið og þá sér í lagi keisaraynjan útheimta mikla orku. Ég hef ákveðið að helga mig hinu nýja embætti af alefli og mun hvergi til spara til að gagnast keisaraynjunni.

Þess vegna hef ég ákveðið að afsala mér öðrum embættum, sem ég hef gegnt um margra ára skeið, þ.e. biskupsembættinu ásamt embættum fjármála- og trúarbragðaráðherra. Þessi störf eru því laus til umsóknar og er hægt að sækja um þau á þræðinum STÖRF Í BOÐI á Baggalútíu svæðinu.

Um leið og ég þakka öllu samstarfsfólki á biskupsstofu og í ráðuneytunum tveimur fyrir gott og farsælt samstarf, hvet ég alla hæfa einstaklinga til þess að senda inn umsóknir.

Ekki verður farið með umsóknir sem trúnaðarmál.