HRINGHENDA

Hringhend/vísa/afbragð/er
óðnum/lýsi/snúna.
Innrím/hýsa/ágætt/ber,
orðin/prísa/núna.

2.bragliður rímar s.s. saman í öllum ljóðlínum. Ath. að rímorðin þurfa ekki að enda eins, heldur nægir að upphafið rími saman eins og hér; vís lýs hýs prís ... þótt aukið rím sé síst verra.

ODDHENT

Oddhent/fjörið/ekki/spörum
eflum/kvæða/grín.
Enn við/förum/upp að/börum
ef við/kjósum/vín.

Í oddhendum bragarháttum ríma s.s. saman 2. bragðliður og 4. bragliður fyrstu línu saman og við sambærilega liði í 3. línu.

SLÉTTUBÖND

Slétta/bandið/ýmsum/er
ærin/þrauta/flétta
þetta/standið/bragar/ber,
blanda/grautsins/rétta

Rétta/grautsins/blanda/ber
bragar/standið/þetta
flétta/þrauta/ærin/er
ýmsum/bandið/slétta.

Í sléttuböndum verður 1. bragliður 1. línu að ríma á móti 1. braglið 3. línu. Einnig verða stuðlarnir að vera í síðustu tveimur bragliðum 1. og 3. línu. Þetta er ekki svo óskaplega snúið, en til að hægt sé að lesa vísu aftur á bak með góðu móti virðist mér nauðsynlegt að hafa einungis eitt orð í hverjum braglið. Sérlega flott þykir ef merkingin breytist við öfugan lestur.
Víxlrímið: graut/þraut & band/stand er því ekki nauðsyn en skemmtilegt skraut engu að síður.

Læt ég þetta gott heita að sinni.
Góðar stundir gott fólk.