Fékk sms í gær frá ónefndu fyrirtæki um að fluginu mínu til Osló hefði verið flýtt til 5.00. Var nú ekki mjög glöð enda sá ég fram á um tveggja tíma svefn - ákvað þó að gera bara gott úr hlutunum - gæti þá ráfað um með dauðadrukknum Norðmönnum á þjóðhátíðardaginn þeirra í þessa sex tíma meðan ég biði eftir að mega tékka inn á hótelið. Skil auk þess vel að það geti þurft að breyta flugum, sér í lagi þessa dagana.
Í gærkvöldi fór ég svo á vefsíðu þessa ónefnda fyrirtækis og á textavarpið (síðast kl. hálftólf) og alltaf var brottfarartími kl 5.00.

Ég ætla svo ekki að lýsa því hversu mikinn sjálfsaga þarf til að vakna kl 2 eftir tveggja tíma svefn en það er örugglega á pari við að hætta að reykja. Kom sumsé á flugvöllinn alveg ósofin og mygluð ....

Þegar ég kom voru milljón manns í röð (er ekki bara ein voa vitlaus) en á skjánum stóð að brottfarartími væri 7.50 - eða sami tími og stóð til upphaflega. Í þokkabót voru svo sjálfsinntékk-vélarnar lokaðar svo ég stóð í röð með hinum milljónunum.

Þegar fúllyndur starfsmaður (kostar að segja Góðan daginn þegar maður er að borga 50.000 kr fyrir örstutt flug - aðra leiðina) öskraði svo NÆSTI á mig spurði ég hvort ekki hefði verið hægt að tilkynna þetta - var svarið ,,ha, birtist þetta ekki á textavarpinu?" - ég svaraði frekar snúðugt að ég væri nú lítið hangandi á textavarpinu fyrir þrjú á nóttunni. ,,Nei, ekki svona á nóttunni" var svarið - ekki það að ég væri beðin afsökunar. Er raunar ekki viss um - þar sem ég hafði fengið sérstaka tilkynningu um annað í sms-i - að ég hefði treyst upplýsingum á textavarpinu hvort eð er.

Ég var því - ásamt ca 1000 öðrum mætt hingað fjórum og hálfum tíma
fyrir brottför - og er alveg að sofna! Með einu litlu sms-i hefði þetta ónefnda fyrirtæki getað sleppt því að ræna mig nætursvefninum og ég væri ennþá heima sofandi. Óháð því hvort það hefði verið sniðugt að kveikja á textavarpinu þá hefði það líka rænt mig svefni - ég hefði klætt mig og farið niður og kveikt á tölvunni (virkar ekki á sjónvarpinu) o.s.frv. (ef flugið hefði svo eftir allt saman verið kl 5 þá hefði þessi tölvuleikfimi leitt til þess að ég hefði misst af vélinni). Síminn er hins vegar við rúmstokkinn og ef fíflin hefðu sent sms þá hefði ég bara rétt rumskað.

Ég geri auk þess ráð fyrir því að ef mér er tilkynnt um breytingu með ákveðnum hætti (þ.e. sms en ekki fjarhrifum, hugsanaflutningi, tölvupósti, eða með öðrum hætti) þá verði einnig tilkynnt um frekari breytingar með SAMA hætti.

Annars er þetta alveg týpískt fyrir það hvernig þetta batterí lítur á ómagana og rumpulýðinn sem fær að fljóta með milli landa og eyðileggja þar með annars ágæta verslunarferð fyrir starfsfólkinu (eða það er að minnsta kosti það sem maður fær oft á tilfinninguna - alla vega áfátækrafarrými), Ef þeir hefðu ekki tilkynnt á pottþéttan hátt um flýtingu á flugi og ég hefði misst af því þá hefðu þeir verið í vondum málum. Ef þeir hins vegar tilkynna ekki um seinkun þá er það bara ég sem missi svefn og er í tómu tjóni. Og það er þeim sko alveg sama um.

Verð því algerlega búin á því og skapgóð eftir því þegar ég loksins kemst á staðinn enda á ég eftir að hanga í 3 1/2 tíma á andsk vellinum.

Til að bæta gráu ofan á svart var ég svo að kaupa mér vatnsflösku á 290 kr. !!!!! Á Íslandi hlýtur það nú bara að vera glæpsamleg álagning...