Frétt — Enter — 14. 9. 2016
Sjaldgæfur pókímóni tryggði samþykkt búvörusamninga
Snorlaxinn er afar tignarleg skepna, rétt eins og forsætisráðherra þjóðarinnar.

Komin er skýring á því hvers vegna svokölluð „stjórnarandstaða“ lufsaðist ekki til að kjósa gegn nýjum búvörusamningi í gær.

Svo virðist sem afar sjaldgæfur pókímoni, svokallaður Snorlax, hafi narrað meginþorra þingheims út úr Alþingishúsinu skömmu fyrir atkvæðagreiðsluna — eftir að hafa sést á vappi á Austurvelli. Einungis þingflokkur Bjartrar Framtíðar varð hans ekki var, því þau eru öll í banni fyrir að „spoofa“ ítrekað.

Grunur leikur á að forsætisráðherra sjálfur hafi komið fyrir svokölluðu „lúri“ við styttu Jóns Sigurðssonar — og segja nokkrir sjónarvottar að hann hafi sjálfur verið í gervi Snorlaxins. En það hefur ekki verið staðfest.

Frímúrarar!

Orgía í kvöld! Fjölmennum.
Nefndin

Lesbók22. 10. 2020 — Enter

Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.

Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:


  • Ekkert starfsfólk
  • Engin viðvera
  • Ekkert húsnæði
  • Engin þjónusta
  • Engin gildi
  • Engin frí
  • Engin áhætta
  • Ekkert internetsamband
  • Enginn samningsvilji
  • Engin kaffivél

Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.

Góðar stundir.

 
Frétt — Enter — 16. 8. 2016
Geitungar hafa ekki efni á að búa í miðborginni
Það er nánast ógerningur fyrir unga geitunga að eignast sérbýli í miðborginni í dag.

Lítið hefur verið um geitunga í miðborg Reykjavíkur í ár, en þeim mun meira í úthverfum borgarinnar. Skýringin er einfaldlega sú að bú geitunganna hafa í auknum mæli verið keypt upp af fasteignafélögum og leigð út til erlendra ferðamanna — enda eftirspurnin mikil.

Talsmaður Félags íslenskra holu– og trjágeitunga (FÍHT) segir ástandið alvarlegt, ekki bara hjá hans félagsvespum, heldur einnig hjá býflugum, veggjatítlum og jafnvel miðbæjarrottum. „Túristunum er einfaldlega troðið í hverja glufu, leigan skrúfuð upp og við hraktir upp í fokkings Árbæ, eða eitthvað þaðanaf verra!“

Hann segist þó telja að úrræði úrræði ríkisstjórnarinnar um ráðstöfun séreignasparnaðar inn á húsnæðislán geti komið sér vel — enda fari geitungar mjög ungir inn á vinnumarkað en komist sjaldnast óskaddaðir á lífeyrisaldur.

Frétt — Enter — 7. 6. 2016
Hanna Birna hættir í fýlu
Aðeins Jóhanna Sigurðardóttir hefur verið lengur samfleytt í fýlu en Hanna Birna.

Hanna Birna Kristjánsdóttir hefur ákveðið að hætta í fýlu. Þetta tilkynnti hún flokksmönnum sjálfstæðisflokksins í tölvupósti sem hún sendi út í dag.

Hanna Birna segir í bréfinu að ástæðan sé einföld, henni sé orðið frekar illt í munnvikunum og nú sé kominn tími til að brosa, í það minnsta út í annað. Ákvörðunin hafi þó ekki verið auðveld.

Gert er ráð fyrir að Hanna kynni fyrirhugaðan uppistandstúr sinn um landið síðar í vikunni.

Frétt — Enter — 12. 4. 2016
Siðareglur Baggalúts felldar úr gildi
Reglurnar voru ritaðar á salernispappír ritstjórnar árið 2001, í flippi.

Siðareglur ritstjórnar Baggalúts hafa verið felldar úr gildi. Er þetta gert til að auðvelda skrif og umfjöllun miðilsins m.a. um siðblinda drullusokka með tað í heila stað, græðgisdrifin skunkakompaní og pólitíska táfýlusokka.

Telur ristjórn sér skylt að geta kallað hlutina sínum réttu nöfnum, en núverandi reglur koma t.d. í veg fyrir að ákveðnir stjórnmálamenn séu kallaðir froðuheilar, auðvaldsskækjur, frethanar og jafnvel málefnalegar pungfrunsur. Sem er miður.

Var ákvörðunin samþykkt einhljóða, eftir að gengið var úr skugga um að reglurnar væru yfirleitt til.

Ertu í sorgarferli?

Ekki byrgja reiðina inni. Erum að ráða núna.

Handrukkun Bússa og Valda.

Frétt — Númi Fannsker — 6. 4. 2016
Skjalataska ríkisráðs horfin
Skjalataska ríkisráðs var nýuppfærð sem svokallað „basic survival kit“ í samræmi við neyðarreglur Almannavarna.

Skjalataska ritara ríkisráðs er horfin úr peningaskáp stjórnarráðsins. Ritari ríkisráðs hafði nýverið, í samráði við skemmtanastjóra stjórnarráðsins, látið uppfæra innihald skjalatöskunnar í samræmi við neyðarreglur.

[*Uppfært]
Sigmundur Davíð Gunnlaugsson sást í hádeginu á hlaupum upp Esjuna með töskuna, partýhatt á höfðinu og Risaflugeldapakka frá Landsbjörg.

Frétt — Enter — 5. 4. 2016
Þessi heysáta er í augnablikinu forsætisráðherra
Sátan hefur unnið ýmis trúnaðarstörf fyrir framsóknarflokk.

Samkvæmt nýjustu heimildum gegnir nú þingeysk heysáta embætti forsætisráðherra.

Fréttin verður uppfærð ef eitthvað breytist.

Frétt — Enter — 5. 4. 2016
Gleymdist að segja Sigmundi frá neyðarútgönguleiðum
Neyðarútgangi á bakhlið Alþingishússins var komið fyrir í stjórnartíð Ólafs Thors.

Svo virðist sem gleymst hafi að segja Sigmundi Davíð, þaulsitjandi forsætisráðherra, frá mögulegum neyðarútgönguleiðum úr þeirri vonlausu stöðu sem hann er í.

Kann þetta að skýra það að ráðherra virðist ekki koma auga á augljósustu leiðina til að forða sér út úr þeirri klípu sem hann hefur komið sér í.

Rétt er þó að taka það fram að ráðherra hefur myndað með sér gríðarlegt óþol gegn ráðleggingum flugfreyja og því er ekki ósennilegt að hann hafi hreinlega hunsað leiðbeiningarnar á sínum tíma.

Feitt barn

óskar eftir að komast í kynni við ósýnilegan vin. Mikið af nammi í boði fyrir réttan aðila. Afgreiðsla vísar á.

Frétt — Enter — 4. 4. 2016
Ólafur Ragnar flýtir för sinni til Íslands
Forsetinn er á ferð í þjóðarloftbelgnum, sem ber hið skemmtilega nafn Sigmundur.

Ólafur Ragnar Grímsson, forseti Íslands og öryggisventill, hefur ákveðið að flýta heimför sinni frá útlöndum þar sem hann er í einkaerindum.

Ólafur Ragnar freistar þess nú, sem kunnugt er, að vera fyrsti þjóðhöfðinginn sem flýgur umhverfis jörðina án þess að taka pissustopp.

Voveiflegir atburðir hér heima hafa sett þessa áætlun í uppnám en forsetinn lendir við Bessastaði eldsnemma í fyrramálið.

Hann vildi þó taka fram að forseti Íslands mætir aldrei of seint. Né of snemma. Hann mætir á svæðið nákvæmlega á þeim tíma sem hann ætlar sér.

Ólafur hyggst svo gera aðra tilraun síðdegis á morgun, eða eftir að hann hefur rassskellt forsætisráðherra, skipað utanþingsstjórn og bjargað lýðveldinu frá glötun.

Frétt — Enter — 4. 4. 2016
Pútín neitar að tjá sig um Panamaskjölin
Pútíni virðist drullusama.

Fréttamenn Baggalúts hafa árangurslaust reynt að ná tali af Valdimari Pútíni, Rússlandsforseta vegna meintra tengsla hans við panamaskjölin svonefndu.

Skilin hafa verið eftir ótal skilaboð á símsvara hans og í talhólfi auk þess sem móðir hans hefur ítrekað verið beðin um að skila því til hans að hætta að láta eins og smákrakki.

Er þetta mjög miður, því Pútín er að öllu jöfnu mjög hress og skemmtilegur viðmælandi með ríka kímnigáfu og kemur gjarnan með fersk og skemmtileg sjónarhorn á erfið mál.

Verst er þó að þessi framkoma leiðtogans skapar afar slæmt fordæmi, því litlir þjóðhöfðingjar og stjórnmálamenn um allan heim sem líta upp til hans byrja auðvitað samstundis að apa þetta eftir honum — eins og aðra stæla í honum.

Frétt — Enter — 29. 3. 2016
Aflandsliðið kynnt á næstu dögum
Ljósmyndari Baggalúts bíður spenntur eftir fyrsta afleiknum í stöðunni.

Nánast er fullskipað í Af–landslið Íslands, en endanleg uppstilling verður kynnt á allra næstu dögum.

Liðið mun keppa fyrir Íslands hönd í ýmsum greinum, m.a. fjármálagerningum, undanskotum, fléttum og hverskyns reikningskúnstum.

Er liðinu spáð góðu gengi, enda skipað úrvals fólki úr efstu stigum þjóðfélagsins, með mikla reynslu.

Stífar æfingar fara nú fram á Jómfrúreyjum og því hefur eðlilega reynst erfitt að ná tali af þessu liði.

Frétt — Enter — 23. 3. 2016
Jólasveinarnir íhuga forsetaframboð
Þvörusleikir, Giljagaur og Einar, frændi þeirra.

„Það hafa margir komið að máli við okkur og við erum að skoða málið,“ segir Giljagaur Grýlu– og Leppalúðason, talsmaður jólasveinanna. Þeir íhuga nú sameiginlegt framboð í komandi forsetakosningum.

Hann segir að embættið gæti hentað þeim bræðrum vel, þeir séu gæddir ríkri þjónustulund og auk þess geti þeir hæglega skipt með sér embættisverkum án þess að nokkur verði þess var.

„Við erum vanir að skemmta ólíklegasta fólki og halda því uppi á innihaldslausu snakki. Svo erum við beisikklí ekki að gera rassgat ellefu mánuði á ári, þannig að við getum vel bætt þessu við. Eini gallinn er að við tölum ekki frönsku.“

Sveinarnir eru nú að safna meðmælendum — en þeir segjast eiga inni greiða hjá „ýmsum óþekktarormum“ svo það ætti að reynast létt verk.

„Það eru reyndar nú þegar 13 jólasveinar í framboði, en við látum það ekki stoppa okkur.“

        1, 2, 3, 4 ... 381, 382, 383  


§ ÚR SAFNI BAGGALÚTS:
ÚR SAFNI — 22. 9. 2010 — Enter

Þingmaður, sem ekki vill láta nafn síns getið, vill koma því á framfæri að sér þyki 'bara ljómandi gaman' að …

»MEIRA

ÚR SAFNI — 29. 4. 2002 — Myglar

Alþingi hefur samþykkt að ríkissjóður skuli ábyrgjast allar lántökur Stoke City í tilraunum þeirra til að komast upp í fyrstu …

»MEIRA

ÚR SAFNI — 13. 9. 2006 — Númi Fannsker

Sæmundur Sigmundsson, prentari, fann í gær fyrir algera tilviljun heimasíðu á internetinu sem innihélt umtalsvert magn af klámfengnu efni; jafnt …

»MEIRA

LESBÓK — Enter — Dagbók
 
LESBÓK — Enter — Dagbók
 
ÚR SAFNI — 19. 10. 2010 — Enter

Ríkisstjórnin samþykkti nú í hádeginu frumvarp sem gerir ráð fyrir því að svokallaður fávitaháttur fyrnist tveimur árum eftir hann hgengur …

»MEIRA

ÚR SAFNI — 3. 3. 2003 — Enter

Íslenskur tilraunagarðyrkjubóndi, sem síðastliðið vor gróf sig í jörð eftir að hafa innbyrt 750 mg af genabreyttum rósablöðum, neyddist …

»MEIRA

ÚR SAFNI — 28. 10. 2010 — Enter

Alþjóðlegi bangsadagurinn fór vel fram í gær, en á þeim degi mætir fólk til vinnu með náinn ættingja eða kunningja …

»MEIRA

LESBÓK — Númi Fannsker — Dagbók
 
LESBÓK — Númi Fannsker — Dagbók
 
ÚR SAFNI — 14. 2. 2013 — Númi Fannsker

Feneyjanefndin ákvað á fundi sínum í vikunni að framlag Íslands til Feneyjatvíæringsins á næsta ári yrði þverpólitíski harmleikurinn Stjórnarskrárfrumvarpið. Í umsögn …

»MEIRA

ÚR SAFNI — 25. 9. 2003 — Númi Fannsker

Hin kunna eftirherma, Gunther Spassmo, lenti á Keflavíkurflugvelli í morgun, en Gunther er heimsfrægur fyrir að herma ógleymanlega eftir Frelsisstyttunni, …

»MEIRA

ÚR SAFNI — 21. 1. 2003 — Spesi

Félagarnir Hreinn Baldursson og Björn Ingason hafa verið ráðnir í starf smakkara fyrir forsetafjölskylduna á Bessastöðum. "Við eigum bara að …

»MEIRA