Ég heyrði í morgun útvarpsviðtal við ungan mann sem er í forsvari fyrir hnefaleikakappa á Íslandi. Er þeim augljóslega mikið í mun að bæta ímynd íþróttarinnar, sér í lagi vegna þess hve brösulega gekk að bera hana á borð fyrir landann til að byrja með, eins og frægt er orðið. Af því sem ég heyrði mætti telja að þeim gangi nokkuð vel í því.
Sjálfur hefi ég ekki haft miklar skoðanir á hnefaleikum og hvort leyfa skuli keppni í þeim hér á landi, en eftir að hafa heyrt málflutning þessa unga manns er ég ekki frá því að ég neyðist til að endurskoða þá afstöðu mína.
Til að byrja með gætti hann þess að vanda málfar sitt og notaði meðal annars orðasambönd eins og "...hvort þessi vettvangur eigi sér einhverja stoð í raunveruleikanum." Þá gætti hann þess að leiðrétta mismæli sín þegar hann talaði af misgáningi um Keflavík: "Ég meina Reykjanesbær."
Þá talaði hann um að hrottaskapur (e. brutalism) sá sem fylgir hnefaleikum liggi djúpt í "víkingaeðli Íslendinga", hann ræddi um "aðferðafræði" íþróttarinnar og talaði um að koma henni upp á "menningarlegt plan".
Hmm... Eru hnefaleikar þá eftir allt saman hámenningarleg akademísk fræðigrein með sterkri sagnfræðilegri skírskotun til íslensku þjóðarsálarinnar?
Nú þá er þetta allt í lagi.
Hverjum datt nú í hug að taka tilboði ítalska verktakafyrirtækisins Impregilo? Flögraði ekki að mönnum að slíkir kónar yrðu til vandræða? Fyrirtæki sem ítrekað hefur orðið uppvíst að mútum og vafasömum viðskiptaháttum!
Voru menn hissa þegar Ítalirnir tróðu starfsmönnum sínum inn í vasklausar kytrur þar sem þeir máttu dúsa í fjölþjóðlegri táfýlu hver um annan þveran? Nú eða þegar þeir beita öllum ráðum til að sleppa við að greiða þau laun sem þeim ber?
Grunaði fjandakornið engan að það væri ástæða fyrir því að ítalska verktakafyrirtækið Impregilo var með langlægsta tilboðið?!
Er nú ekki kominn tími til að stjórnvöld grípi hér í tauma og Davíð sýni þessum glæpasnúðum hvar hann keypti ölið?
» Sálmar | » Gagnrýni | » Sögur | » Leikrit | » Siðir | » Heimsljós
