Ég vaknaði nokkuð seint í morgun og missti því af fréttum kl. 6. Þetta er vegna þess að ég hef legið á hinum helga dívan sem ég kalla svo, reykt mína pípu og spekúlerað um lífið, tilveruna, ástina, pólitík, trú og fleira, langt fram á kvöld alla vikuna. Ég hefi ekki komist að nokkrum sköpuðum hlut sem ég ekki vissi fyrir en ég rifjaði upp kenningu sem ég setti fram á námsárum mínum um jafnvægi alheimsins og hið kosmíska samhengi orsakar og afleiðingar. Sú kenning er jafnsönn í dag og hún var þá og ég held sveimér að ég ætti að hripa hana niður og koma henni á prent.