Lesbók07.10.02 — Enter

Sagt er að hnignun menningarsamfélaga fylgi aukin kynvilla. Hvers kyns ónáttúra er jafnan talin þrífast best í skjóli gnægtahlaðinnar velmegunar og attaníossatilburðir færast gjarna í auka meðal nautnafíkinnar yfirstéttar. Þá eru friðelskandi þjóðir líklegri til öfuguggaháttar, því oft dregur tilbreytingarleysið og leiðinn fram annars hulið óeðli. Þá er suðrænum þjóðum talið hættara við samkynhneigð, en það er þó leiðinleg mýta, sem orsakast af því hvað Ítalir eru miklar kerlingar.

Eins og lesendur ef til vill vita, er mér ekkert mannlegt óviðkomandi og ég víla ekki fyrir mér að kanna samfélagið ofan í daunillan kjölinn ef því er að skipta. Það var af þeim hvötum - og engum öðrum - sem ég brá mér á keppnina 'Dragdrottning Íslands 2002', sumsé til að kynna mér hinn goðsagnakennda 'Dragsúg (e. drag-show).

Nú segja mér vísir menn í kynjafræðum að sú hvöt karla að klæðast yfirgengilegum kvenmannsfötum og stríla sig upp með ókjörum andlitsfarða þurfi alls ekki að tákna að viðkomandi sé hómóseksjúalisti. Skal ég svosum ekki rengja það. Ekki verður hörkutólið Þór sakaður um ergi þó hann hafi skrýðst brúðarlíni til að endurheimta hamarinn Mjöllni frá níðingnum Þrym. Nei - en hann flaðraði heldur ekki upp um alla veggi og söng afmorsvísur úr smiðju Tinu Turner!

Skrækur söngur og glennulegur líkamsburður portkonunnar voru aðall þeirra ungu manna sem stigu á sviðið þetta kvöld. Að undanskilinni aðdáun minni á jafnvægiskúnstum þeirra - orsökuðum af ójarðneskum fótabúnaði - var mér ekki skemmt. Eftir því sem leið á varð mér æ bumbulla og bætti þar þema kvöldsins, Eurovision, ekki úr skák. Milli þess sem 'ungfrúr' Makedónía og Kambódía trítluðu um og klemmdu saman á sér þjóhnappana voru sýnd slefgræn niðurlægingarmyndbönd af þessum annars myndarlegu piltum í mis gáfu- og smekklegum aðstæðum. 'Flökurt' er í þessu samhengi ágætt orð, 'ómótt' er betra.

Ég hélt út keppnina, stóð mína plikt, en þegar síðustu hryglur 'Ginu Tonic' dóu út snerist ég á hæl - og hnakka - og ætlaði út. Fyrir aftan mig stóð dómnefndin og skyndilega stóð ég augliti til auglitis við barnatrúðinn Felix Bergsson. Af ótta við að æla bæði yfir hann og Þorstein J., sem ég kann ágætlega við, öskraði ég ekki. Lét nægja að grípa um öxl hans og horfa á hann áminnandi ásökunaraugum.

Síðan rauk ég út og inn í næsta port.

Ég er ekki fordómafullur maður. En ég er áhyggjufullur. Ég skora því á foreldra að sýna aðhald, aðgát og árvekni. Það er ekki nóg að gefa litla englinum sínum Playmo - hann verður fjandakornið að nota það rétt! Annars líður þetta litla samfélag undir lok áður en varir.

 
Enter — Sálmur
 
Myglar — Sálmur
 
Númi Fannsker — Sálmur
 
Enter — Sálmur
 
Kaktuz — Forystugrein
 
Kaktuz — Sálmur
 
Kaktuz — Sálmur
 
Enter — Leikrit
 
Númi Fannsker — Sálmur
 
        1, 2, 3 ... 179, 180, 181, 182