Lesbók15.05.07 — Enter

Það er nú meiri útvatnaða andskotans óværan þetta lýðræði. Göllum skrýdd og úr sér gengin.

Stór galli eru frambjóðendur. Flennistór.
Hvernig er hægt að réttlæta það að fela stjórn ríkisins gleiðmynntum, mismenntuðum framagosum sem eytt hafa bróðurparti lífsins við bakraufasleikjur og slefsmurt framapot í einangruðum heilaþvottastöðvum stjórnmálaflokkanna? Hverjum hvarflar til hugar að þetta sjálfsnaflasokkna pakk hugsi um annað en eigin hlaunahægindi?

Stærri galli eru kjósendur. Sýnu stærri.
Hvurn grindhoraðan grefilinn ætli þetta flatskædda úthverfakítti með sín flotuðu gólf viti hvað sjálfum þeim er fyrir bestu – hvað þá náunganum. Og hvað í fáklæddum fimbuldrýslum ætli innræktaðar og uppnefjaðar miðbæjarrottur, fráteknar til langframa af eigin hippheitum og kúlelsi, hafi til mála að leggja um heill þjóðar. Ekki neitt. Ekki yfirgefna baun á balabotni. Ekki fremur en sjálfdeyjandi landsbyggðarhryggðin, sem enn lifir í von um að fjallinu verði sturtað með vænum ríkisstyrk í bakgarð Múhameðs áður en síðasta mærin í dalnum kemst úr barneign.

Stærsti gallinn er þó tíminn sem fer í þetta þvottekta þrugl allt. Alstærsti.
Eru engin takmörk fyrir því hvursu lengi hægt er að fylgjast með opinberum starfsmönnum með mikilmennskubrjálæði í óspennandi útsláttarkeppni? Og peningarnir sem í þennan úrbeinaða ófögnuð fara. Tannhvítun frambjóðenda ein og sér dygði efalítið til reksturs huggulegs hátæknisjúkrahús, meðalstórs.

Það er nóg komið. Nú hættum við þessu kargúldna kosningastússi öllu, kalkúnskalt - og einkavæðum þetta 300 kílóhræðna þorp okkar. Ráðum nokkra sleiphærða, graðhygða og ofmenntaða verðbréfganagla í brúnna. Seljum allt sem selja má, finnum olíu, lifum í vellystingum til enda veraldar og finnum okkur huggulegan kóng til að flagga á tyllidögum.

Ég er laus.

 
Enter — Forystugrein
 
Enter — Forystugrein
 
Enter — Sálmur
 
Númi Fannsker — Forystugrein
 
Enter — Sálmur
 
Spesi — Forystugrein
 
Númi Fannsker — Forystugrein
 
Enter — Forystugrein
 
Enter — Forystugrein
 
     1, 2, 3 ... 180, 181, 182