Haldið þið að það eigi ekki bara að leggja niður hana NFS.

Furðulegt.

Eins og það var notalegt að setjast niður frá morgni til kvölds og fylgjast með fréttum og fréttaskýringum - þar sem íslenskur veruleiki var krufinn til mergjar og mergurinn jafnharðan bútaður í grunneindir sínar - æ ofan í æ - daglangt.

Hvernig á maður nú að vita hvað er að gerast? Þarf maður virkilega að fara að lesa dagblöðin aftur? Eða horfa á kvöldfréttir? Almáttugur.

Og hvert eiga allir lampalegnu, kinnbónuðu sjónvarpspredikararnir að fara? Hvað verður um öll jakkafötin, allar dragtirnar? Allan farðann?

Allt þetta þrautreynda, sérþjálfaða starfsfólk. Allur þessi metnaður, áhugi og einbeitti vilji til að gera Ísland að helstu fréttaparadís heims. Öfundaða af flennifréttastofum útlendum, sem síhungrar í fréttamat - þrátt fyrir að hafa allan heiminn undir. Ekki bara 101, Kárahnjúka og Bubba.

Er það nú allt til einskis unnið?

Eða var kannski andskotann ekkert að frétta fyrir það fyrsta?