Ég brá mér í kvikmyndahús á dögunum til að berja augum nýjan vestra sem mikið hefur verið látið með. Ég hugsaði mér gott til glóðar því æði langt er síðan almennilega kábojamynd hefur rekið hér á fjörur.

Raunar var ég strax efins um hæfi leikstjórans Ang Lee til að skila hörðum heimi kúreksturs og skamm­byssu­kúnsta á hvíta tjaldið, en hann hefur á samviskunni bæði baðsloppahörmungina 'Tígur í hnipri, dreki að fela sig' og afspyrnuherfilega ævisögu grængriðungsins Húlks.

Þá hefði mig nú einnig mátt gruna ýmislegt þar sem handritið var byggt á smásögu eftir einhverja kerlingarálft, hverrar helsta afrek mun hafa verið að fá sögu sína Skipatíðindi kvikmyndaða af sænska ömurðarpésanum Lasse Hallström.

En jæja, þarna var ég sumsé, gíraður upp fyrir hvínandi byssubardaga, höfuðleðraskurð og hugvitsamleg póstrán - mætti meir að segja með hattinn.

Þá byrja ósköpin. Og þvílíkur þverbullandi andstyggðar ósómi. Eru engin takmörk fyrir því hverju þessir fégírugu moðmangandi bíóblesar leyfa sér að pranga inn á saklausa kvikmyndahúsagesti? Er þessum mannskemmandi lúsalöbbum bévítakornið ekkert heilagt lengur?

Þarna birtast á tjaldinu tveir bráðhuggulegir kúrekar. Gott og vel. Til í tuskið. Þess albúnir að lumbra á indíánum og þeysa yfir gresjurnar. En neinei. Þá eru þetta bara einhverjir hommar!

Ójá. Bossahossandi, flennihýrir og öfugyggðir - og kindasmalar í ofanálag! Þessu er svo varpað upp á tjaldið eins og ekkert sé sjálfsagðara. Það þykir bara hið besta mál að riddarar sléttunnar séu þarna að hnoðast saman upp á heiði, berrassaðir og brosþýðir.

Hvílík endemis della. Hvílík aðför að karlmennskunni. Hvílík vanhelgun í sjálfu musteri manndómsins.

Hommakúrekar eru ekki til!

Þeir hafa aldrei verið, og verða aldrei til. Þannig er það bara. Og ég þarf engan taívanskan sóðapjakk til að sannfæra mig um annað. Þessi Ang Lee getur bara tekið þessa attaníossavellu sína og troðið beinustu leið upp í sílófóninn á sér. Ég læt ekki bjóða mér svona rugl.

---

Stjörnurnar tvær fá aðalleikararnir fyrir hattana. Þeir voru ferlega smartir.