Voðalega eru þessi Nóbelsverðlaun eitthvað óspennandi og lítilfjörleg orðin. Það er verið að verðlauna menn fyrir eitthvað bévítans dútl og gauf ár eftir ár.

Í læknisfræði eru nú veitt verðlaun fyrir eitthvurt magapínumeðal, í eðlisfræði fyrir að fikta með leysigeisla og í efnafræði fyrir að leysa upp kolefni og tjasla því aftur saman.

Þvílíkt prump!

Hvar eru lifnipillurnar, tímaferðalögin og heilmyndirnar? Hvar eru skreppitúrarnir til tunglsins, eilífðarvélarnar og bévítans gullgerðarmaskínurnar?

Er þetta virkilega það skársta sem er að gerast í vísindaheiminum?

Hvar er metnaðurinn hjá þessu ofdekraða tilraunastofupakki? Það vantar svei mér þá allt hugmyndaflug í þessa sloppklæddu fimbulnörda, ég meina ... leysigeislar! Kommon, það er 2005, ekki 1950. Og magasár? Hafa mennirnir aldrei heyrt um ebólu? Eða bara kvef?

Á að vera að verðlauna menn fyrir svona hálfkák? Hampa þeim fyrir svona dómadags miðjumoð og andleysi. Fyrr má nú vera jákvæðnin og upppeppelsið í þessum bévítans Svíum.

Ætli einhver hress sjoppueigandi fái svo ekki hagfræðiverðlaunin? Gæti trúað því.