Í sjálfu sér er mér nokk sama hvað þingmenn hafa í laun. Mér þykir sjálfsagt að þessir trjónukrabbar lýðveldisins hafi viðunandi tekjur þannig að Alþingi skipi hæft fólk og duglegt á hverjum tíma.

Eins þykir mér gott og vel að forsætisráðherrar fái sómasamleg eftirlaun - þó heldur vafasamt hljóti að teljast að verðlauna þá sérstaklega sem lengst halda sér í stólinn og neita að víkja.

Hins vegar - og takið nú vel eftir.

Hvers vegna í djúpfrystum og daunillum dauðanum á að láta formenn stjórnmálaflokka fá sérstakt 50% álag á þingfararkaup sitt?

Ég veit ekki til þess að það komi ríkisféhirði né skattgreiðendum nokkurn skapaðan hlut við hvort þingmenn eða aðrir ríkisstarfsmenn sinni einhverjum félagsstörfum úti í bæ!

Á þá ekki hver annar ríkisstarfsmaður rétt á samsvarandi álagi ef svo heppilega vill til að viðkomandi sinni formennsku í björgunarsveitinni Hallbirni - eða einhverju ámóta?

Og sannið þið til. Komist slík dómadags þvæla í gegnum þingið verður hver einasti þingmaður í sérframboði í næstu kosningum.