Ég veit ekki hvort þið hafið almennilega áttað ykkur á því, kæru landsmenn - en íslenska kvennalandsliðið í knattspyrnu sigraði Pólverja 10:0, í undankeppni EM í gær.
TÍU FOKKING NÚLL!
Svo eru menn að væta buxur yfir jafntefli karlaliðsins við útbrunna og kengtimbraða Þjóðverja. Iss.
Þetta er raunverulegur sigur, afdráttarlaus og glæsilegur - og ef einhver svo mikið lyftir augabrún og tuldrar að þetta sé nú 'bara' kvennafótbolti skal ég taka þann hinn sama og loka hann inn í litlu rými með Olgu Færseth þangað til hann skráir sig grenjandi í bæði Bríeti og kvenfélag Sauðárkróks.
- Auk þess þarf enginn að segja mér að þetta hafi bara verið kvenmenn í liði Pólverja.
Loks legg ég til að Ásthildur Helgadóttir, fyrirliði, verði gullhúðuð og henni komið fyrir í stað styttunnar af Jóni Sigurðssyni á Austurvelli - eftir að hún leggur skóna á hilluna.