Haldiði að hann Auðunn blaðasali sé ekki bara orðinn sjötugur. Blessaður öðlingurinn.

Það kemur fram í frétt á dv.is í dag að Auðunn hafi selt „DV um áratuga skeið, meðal annars í miðborg Reykjavíkur með framúrskarandi góðum árangri.“

„Auðunn hefur staðið með blaðinu í gegnum þykkt og þunnt og staðið úti í öllum veðrum til að selja blaðið. Hann kveðst vera ánægður með DV og segist leggja mikla áherslu á að borga áskriftina samviskusamlega,“ segir ennfremur.

Nú spyr ég: geta þessir dévaffarar ekki splæst áskrift á þennan besta vin sinn til fjölda ára sem stendur í öllum veðrum áratugum saman og veifar þessu blaði þeirra- eins og klettur í hafinu, viti á sjóbarinni eyðiströnd íslenskrar blaðaútgáfu? Þarf þessi brosmildi blaðasali að hafa fyrir því að „borga áskriftina samviskusamlega?“

Iss.

Og þó - þeir gáfu honum náttúrulega konfektkassa.