Ég var varla búinn að jafna mig eftir rannsóknarferð mína til Svínþjóðar þegar undirbúningur hófst fyrir lag Baggalúts í tilefni sumardagsins fyrsta. Að venju kom það í hlut austur-þýsku þungarokkshljómsveitarinnar Thundervolt að annast flutninginn.

Upptökum lauk í gær og nú er eftirvinnsla lagsins í gangi, en hún er eins og svo oft áður í höndum snillingsins Guðmunds Kristins Jónssonar. Sjálfur fylgdist ég með þegar verið var að taka upp söng og bakraddir í gærkvöld og verð ég að segja að ég varð mjög hrifinn af því sem ég sá og heyrði.

Fyrir upptökurnar vissi ég að sjálfsögðu hversu einstakur söngvari Tony Ztarblaster er. Gaman var að fylgjast með honum við upptökur - þó stutt væri, þar sem hann syngur jafnan allt í einni töku. Hann er ekki kallaður Tony "one take wonder" Ztarblaster fyrir ekki neitt! Reyndar tók hann að venju upp aukatöku þríund ofar (fyrir einkasafnið sitt), en sú útgáfa á ekki eftir að koma fyrir sjónir almennings fyrr en að honum gengnum...

Það sem kom mér þó skemmtilega á óvart var hversu ótrúlega góða bakraddasöngvara hljómsveitin hefur innanborðs. Færnin og vinnubrögðin voru með ólíkindum góð og á örskömmum tíma var farið að hljóma eins og Tony væri með heilan kór á bak við sig.

Sannarlega gaman að fylgjast með slíkum fagmönnum að störfum! Mikið hlakka ég svo til að heyra endanlega útgáfu lagsins, að ég tali nú ekki um að leyfa gestum Baggalúts að njóta þess með okkur!