Hugi Huginsson, landkönnuður, telur sig hafa fundið hið svokallaða „rassgat“ sem menn hafa leitað um aldir en aldrei fundið.
„Það er ekki um að villast, ég er staddur hérna útí rassgati,“ sagði Hugi rogginn í samtali við Baggalút, en hann segir rassgatið staðsett mitt á milli buskans annars vegar og blásins hins vegar.
„Það er nú frekar eyðilegt hérna, en það kom mér samt á óvart hve margir búa hérna. Innfæddir kalla þetta raunar Grafarholt.“
Rýmingarsala - vegna óvissu á markaði
Silfurskottueistu, krókódílatár, leðurblökugarnir, marhnútahráki og muldir nykurhófar. Einnig lítið notað finngálkn og blindur urðarköttur. Allt á að seljast. Annars verður ykkur öllum breytt í froska.
Nornabúðin
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.