Í dag eru liðin 100 ár frá því Böðvar Beinteinsson, bloggari, var leiddur fyrir aftökusveit á Austurvelli, eftir að hafa hlotið sjöfaldan dauðadóm fyrir alvarleg meiðyrði og landráð á bloggi sínu; bloggbodvar.island.dk.
Í frægri færslu kallaði hann Jónas Hallgrímsson „ofurvæmna, náttúrulausa fyllibyttu“ og Fjölnismenn alla „þröngsýnar þjóðrembur með deyjandi hrognamál á vörum“. Auk þess kallaði hann Jón Sigurðsson „uppdubbaða moldvörpu“ með „sjúklega minnimáttarkennd gagnvart siðmenntuðum þjóðum“.
Voru ummælin dæmd dauð og ómerk og var Böðvari gert að fjarlægja þau af bloggi sínu og brenna.
Í kjölfar dómsins gekk yfir landið hrina málsókna gegn íslenskum bloggurum og voru þeir hundeltir og ofsóttir hvar sem í þá náðist. Svo nærri gekk þetta fár íslenskum bloggheimum að blogg lagðist að mestu af hér á landi í hartnær öld.
SVENNI!
Þú skuldar mér 750 kall síðan á laugardaginn. Borgaðu - annars...!
Ottó
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.