Eins og alkunna er stendur til að reisa sk. 'tónlistarhús' í Reykjavík. Margt er í meira lagi grunsamlegt við þessa framkvæmd eins og nefnt hefur verið í framhjáhlaupi í öðrum þráðum hjer:

(1) Kostnaðaráætlun við byggingu er 12 milljarðar en ljóst í ljósi reynslunnar að kostnaður verður a.m.k. 20 milljarðar. Þetta er grunsamlega hátt fyrir einn glerskála.

(2) Umferðaræðar nálægt húsinu eiga að vera neðanjarðar. Þetta er líka grunsamlegt og bendir til að um eitthvað hættulegt sje að ræða.

(3) Engar aðrar byggingar verða í nánd við tónlistarhúsið og það sem því tilheyrir og ein hlið þess er alveg niðri við ströndina (ef strönd skal kalla). Grunsamlegt af svipuðum ástæðum og (2) að viðbættri nálægð við sjó er líka er grunsamleg.

(4) Árlegur rekstrarkostnaður er himinhár og bendir til að árlega standi til að vera með afar fjárfreka starfsemi er eigi þolir dagsins ljós.

Eflaust eru allir hjer sammála oss er vjer drögum þá ályktun að um sje að ræða sambyggt kjarnorkuver, flotastöð, miðstöð fyrir kafbátahernað, kóbaltvinnslustöð og jafnvel langþráða stjörnusambandsstöð. Að starfsemin tengist eitthvað 'tónlist' er einungis áróður í þeim tilgangi að fela hinn raunverulega tilgang með framkvæmdunum. Að hafa Sundabraut neðanjarðar er eflaust líka liður í samsærinu.

Ef um stjörnusambandsstöð er að ræða þá er ljóst að gríðarleg samkeppni á eftir að verða í þverkosmíska sambandsbransanum, hvar þeir hafa náð að komast yfir það gríðarlega magn Kóbalts sem þarf til að koma slíkri stjörnusambandsstöð á laggirnar er mér hulin ráðgáta... ég legg til að farið verði í njósnaleiðangur til að komast að snoðum um það hvað hér er á seiði...

Ég hélt að flestir vissu að Smáralindin er alþjóðleg stjörnusambandsstöð Íslands. Undir yfirskini verslana og stórmarkaða geta geimverur í hvers kyns dulargervum komið þangað og haft samband í við heimaplánetur sínar með því að versla sér DVD-diska, Diesel-gallabuxur, Ciabatta í bakaríi Jóa Fel. og alls kyns annan varning. Þegar debet-/ kreditkorti viðkomandi geimveru er rent í posann fara upplýsingar til reiknistofu bankanna. En á sama tíma fara einnig stafrænar upplýsingar eftir sérstökum línum upp í "kónginn" á Smárlindartyppinu sem er í raun risastórt kosmískt loftnet. Og þaðan eru upplýsingarnar sendar út í geim.

Einfalt ekki satt?

Þannig að tónlistahúsið er ekki stjörnusambandsstöð. Ég hef grun um að þetta sé greni frá útsendurum ósómans bin Laden og að þaðan verði gerðar árásir á íslenska alþýðu með fiðlum og víólum, Bach og Brahms og Handel. Já, þeir eru lævís kvikyndi þessir nútíma hryðjuverkamenn.

Það vita nú allir að fyrirhugað tónlistarhús er ekki stjörnusambandsmiðstöð af neinum toga. Þetta er skotpallur! Allrahanda skot- og eldflaugamiðstöð, hvort sem skjóta skal á alþjóða- eða alheimsvettvangi. Byggingin er höfð út við sjó til að hlífa öðrum mannvirkjum við truflunum eða skemmdum, en engu að síður er staðsetningin fullkomin við miðstöð siðmenningar og stjórnunar í landinu. Sérstaklega hönnuð formin á ytra gler-byrðinu eru til varnar óvinveittum geislum.

Upphaflega var hið svokallaða "álver" í straumsvík ætlað til þessa starfa, en það þótti ekki nógu öruggt þar sem símar og annar samskiptabúnaður gæti brugðist á ögurstundu. Þegar þessar framkvæmdir eru tilbúnar þarf háttvirtur forsætisráðherra (eða verðandi einræðisherra ef eitthvað er að marka heimildir mínar) einungis að fara út á verönd fyrir utan stjórnarráðið og gefa merki. Það var annaðhvort þessi kostur eða öskjuhlíðin, en þetta þótti fýsilegra þar sem Öryggis- og stjörnustríðsmiðstöð ríkisins er jú í Perlunni, og yrði því of auðvelt að gera báðar stöðvarnar óstarfhæfar í einni árás.

Einnig hef ég heyrt að skotpallurinn verði notaður í afþreyingarskyni, t.d. með flugelda og aðra skemmtun á Menningarnótt, 17.júní og mögulega á Hinsegin dögum.

Er samt ekki alveg merkilegt hvað stjórnvöld eru slök í að dylja yfir leynilegar framkvæmdir sínar? 12 milljarðar fyrir þetta glerhýsi, 4 milljarðar fyrir að setja skitið glerþak á milli vatnstankanna í Perlunni. Halda þeir að almenningur sé blindur?

Rugl!

Það vita allir að þetta verður eldhúsið hans Hvæsa til að elda ofan í ráðamenn Baggalútíu !

Ég tel kjörið tækifæri hafa skapast til að nýta þessar teikningar og áætlanir til að breyta þessu „tómlistarhúsi“í eitthvað gagnlegt á borð við stjörnusambandsstöð sem gæti hæglega fleytt mannkyni í átt til nýrrar tíðar; stjarnaldar. Þar sem mannkyn getur myndað uppbyggilegt, þverkosmískt bandalag við menningar annarra stjarna, lært að lifa í harmóníu við grunnstreymi Lífsins mikla.

Forgangur hvers ríkis ætti fyrst og fremst að vera leit að sannleikanum. Og þá er sannleikur Stjarnanna þeirra æðstur.

Hér er komið tækifæri sem verður að nýta. Ráðstöfun fjár Símasölunnar í annað en þessa byggingu er fráleit. Skuldir geta beðið, velferðarmál geta beðið og umfram allt getur hátæknisjúkrahús beðið. Til hvers í ósköpunum að brunda bleðlum í framkvæmd verður gangslaus þegar við náum stjarnsambandi við hrein lífsform á öðrum stjörnum, sem hafa náð svo háu stigi þróunar að þær geta læknað verstu sjúkdóma mannskepnunnar með vingjarnlegu brosi!

Nei!

‹Lemur hönd í borð›

Sjörnusambandsstöð í dag, stjörnusambandsstöð á morgun, stjörnusambandsstöð að eilífu!

Die Wahrheit liegt im Archiv! Nýtum „tónlistarhús“ undir Skjalasafn Baggalútíu!

Skammsýni Gúnter!

Með sambandi við æðri lífsform munum við ná tökum á geimtækni á örskömmum tíma. Við munum standa frammi fyrir óteljandi kostum á öllum sviðum, verkfræðilegum, eðlisfræðilegum og sálarlegum.

Sannlega sannlega segi ég þér, að innan tíu ára, verðum við búin að hola út úr Tunglinu og fylla það af sannleikans alltumlykjandi skjölum!

En einvörðugu í skiptum fyrir stjörnusambandið eina!

Þar að auki verður skjalasafn Baggalútíu allt að því óendanlega stórt er stjörnusambandsstöðin er tilbúin sökum óendanlegs magns dýrmætra upplýsinga og fróðleiks er fylgja mun í kjölfarið. Yrði því eigi pláss fyrir skjalasafnið í tónlistarhúsinu. Til greina kæmi að geyma það á Mars en þó er óvíst að hann sje nægilega stór.

Áhugaverðar kenningar. Sem skriffinnur og bjúrókrati hreifst ég sérstaklega af því þegar minnst var á skjöl og skjalasöfn. ‹Gefur frá sér vellíðunarstunu›

Legg ég til að við tökum umsvifalaust upp tengingu við stjörnuþokuna BJÚRÓKRATÍKU, en þar er að finna eitt af stærstu skjalasöfnum í okkar horni alheimsins. Um 16 ljósár af plánetum fullar af upplýsingum, fróðleik, vitneskju, valdi eilífðarinnar!

‹Getur sig vart hamið af spenningi›

Þessi neðanjarðargatnagerð er ekkert annað en yfirvarp fyrir námuvinnsu. Það vita fáir, en það hafa fundist miklar kóbaltnámur undir Kolaportinu (Það er væntanlega geislunin frá kóbaltinu sem veldur því að fólk kaupir þar gamalt dót úr geymslum annarra, til þess eins að koma því fyrir í eigin geymslu þegar heim er komið). Sjálft "tónlistarhúsið" er svo ekkert annað er flotastöð fyrir kafbátana sem notaðir verða til að flytja kóbaltið til útlanda.