Já, nú er desember 2005 og því ekki úr vegi að ryfja aðeins upp þau félagsrit sem birtust hér fyrir tæpum tveimur árum. Áður hef ég birt umfjöllun um félagsrit í nóvember og desember 2003. Hér er að sjálfsögðu mín skoðun og hvet ég ykkur öll til að lesa öll félagsritin sjálf. Eins og í hinum mánuðunum þá voru Félagsritin fjölmörg og mörg hver af gæðum fyrir neðan það sem kallast normal í dag. Þó voru gullmolar inn á milli eins og alltaf. Ég hugsa að ég vindi mig bara beint í dæmið (af laumupúkaástæðum er sumum félagsritum sleppt).

Besta dagbókin
Dagbækur voru margar, en því miður langflestar frekar slakar, lítið unnar og oftast nær eingöngu nokkrar línur (þó ber að geta þess að í samhengi þess sem var að gerast á Gestapó þá stundina, þá voru þær flestar ósköp eðlilegar en notaðar sem ruslakista fyrir ýmiskonar tilkynningar og rugl). Lengsta dagbókin er líklega ekki ekta dagbók þannig séð, heldur pistlingur í formi dagbókar, það var Andskotinn sem fjallaði um skattsvikara.

Þar sem fátt var um fína drætti í dagbókum þessa mánaðar, þá greip ég fegins hendi dagbók sem Urmull Ergis birti, en hann var löngum nokkuð skondinn hér á Gestapó, hér fjallar hann um Erfðabreyttar bensínstöðvar og þó varla ekta dagbókarfærsla.

Besta gagnrýnin
Gestapóar eru snillingar í að gagnrýna og í hverjum mánuði birtist fjöldinn allur af góðri gagnrýni. Urmull Ergis átti mjög góða gagnrýni á bíómyndina Opinberun Hannesar, Hakuchi fer á sprett í glæsilegri gagnrýni sinni á sígildum vestra með John Wayne, Rio Bravo og Júlía gagnrýnir af fagmennsku jólahlaðborð Hótel Borgar.

Stutt og hnitmiðuð gagnrýni Labbakúts um Ædolið fær þó mitt atkvæði sem besta gagnrýnin þennan mánuðinn.

Besta sagan
Engin saga birtist þennan mánuðinn, en einn pistlingurinn var í sögustíl og því dæmi ég hann sem bestu söguna, en það var félagsrit Brenjars um Sjónarhorn 3. persónu.

Besti pistlingurinn
Pistlingar eru yfirleitt vettvangur góðra skrifa þar sem hellt er sjóðandi heitu vaxi yfir samtíðarmenn og málefni. Pistlingur Lómagnúps um Hryðjuverkaárás er ansi hreint skemmtileg.

Urmull Ergis á að vanda mörg góð félagsrit og ætla ég að velja eitt þeirra sem besta pistlinginn þennan mánuðinn, en það er pistlingur hans um Beitarþol ríkissjóðs

Besti sálmurinn

Einungis þrír sálmar birtust sem félagsrit þennan mánuð og því ekki úr miklu að moða. Haraldur stóð þó fyrir sínu og sálmur hans Eftirköst er að sönnu hugljúfur og góður.

Ég ætla að bæta við tveimur liðum og fara þeir hér á eftir:

Furðulegasta félagsritið
Urmull Ergis átti ansi furðulegt félagsrit, um Kartöflupoka og fleira. Labbakútur átii einnig ansi furðulegt félagsrit um Landbúnaðarráðherra.

Eitt allra furðulegasta félagsritið er þó félagsrit DrZprojds en ekki út af því sem hann skrifar í félagsritinu heldur því sem hann setur í orðabelginn
10 mánuðum síðar, kíkið endilega á félagsrit hans um Dulspeikisvik.

Sögulegasta félagsritið

Félagsrit Mikils Hákons um Skeggið er sögulegt. Þá er félagsrit krummo um Áfanga einnig áhugavert í sögulegu samhengi. Félagsrit Haralds um Elliheimili er líka skemmtilegt frá sögulegu samhengi, spurning hvort hann sé kominn á elliheimilið núna.

Þannig var það nú... í heildina séð frekar klént, en þó gullmolar að vanda inn á milli.

Skál og gleðileg jól.

Skarpmon Skrumfjörð