— GESTAPÓ —
Í uppáhaldi:
Félagsrit:
Ívar Sívertsen
Friðargæsluliði.
Heiðursgestur og  skáldjöfur.
Pistlingur - 4/12/07
Líður að júróvisjón

Nú fer að koma að hinsegindögum tónlistarbransans og ætla ég að rýna í þau lög sem keppa um hylli evrópubúa í maí í Belgrad. Lögin verða talin upp eftir enskri stafrófsröð vegna þess að þau eru þannig á júróvisjónpúnkturtjevaff.

Frá Andorru kemur Gíslína (Gisela) og syngur hún angurvært ísskápspopp um Kassa-Nonna (Casanova). Stelpuskjátan syngur bærilega en lagið finnst mér svona endurvinnsla á sænskum lögum síðustu ára. Búmm búmm búmm mæ hart still gós kreisí... textinn hjákátlegur á köflum. Komast ekki áfram.

Ólöf bókavörður (Olta Boka) kemur frá Albaníu og syngur hún um Sumrin á Lefisgötu (Zemrën E Lamë Peng). Sæmilegasta smjörklípa. Smjörið vellur út allt lagið ásamt duglegum skammti af sykurleðju og R'n'B raddbeitingu. Eitthvað eru Albanir að míga utan í rokkarana með því að rífa gítarinn og það virkar ágætlega með smjörfiðlunum. Ósköp klént lag sem nær ekki upp úr forkeppni.

Armenía sendir hana Sigríði (Sirusho) og syngur hún lagið um að kela við Kela (Qele, Qele). Lagið byrjar á þjóðlegum nótum. Það rennur síðan í ísskápsdynki með hljómasetningum og stefjum sem finna má í popptónlist austur-evrópu og Tyrklandi og vísast líka í einhverjum afríkulögum. Textinn er ákaflega slappur enskur texti en Sigríði tekst best upp þegar hún syngur „Yes im hay hoghits eka berem“. Alveg líklegt til að komast upp og þar sem ég er svo svag fyrir lögum frá tónlist sem sækir áhrif sín í suðaustur evrópu þá vona ég að það fari upp. Fínt bara.

Azerbadsjan sendir þá Einar og Símon (Elnur & Samir) og flytja þeir lagið Dagur B. dagsins (Day After Day). Lagið hefst á stórfurðulegu stefi sem maður gerir sér ekki grein fyrir hvort er karlmaður að garga í sullandi falsettu með eistun í hársverðinum eða hvort það er skítfölsk söngkona með nefrennsli sem syngur. Það reynist við nánari skoðun vera annað hvort Einar eða Símon sem er með eistun í hárinu. Síðan rennur lagið út í rokk með þungum bassa og rifnum gítar. Skemmtileg hugmynd en þeir Einar og Símon hljóma stundum eins og blanda af Tom Jones og Morthen Harkett (úr A-ha) eða eins og sandpappír nr. 4 út Byko ofan á plötu með Álftagerðisbræðrum. Frekar óspennandi og klisjukennt lag. NIÐUR MEÐ ÞAÐ!

Næstur er það beljurússinn frá Hvítarússlandi hann Rósmundur Albertsson (Ruslan Alehno) og hann flytur lagið Mundu að ýta á save (Hasta La Vista). Enn eitt utanímigið á iðnaðarpopprokki frá 1990 - 1995 í ammríku. Ofsalega tragískt lag sem er um enn eitt parið sem hættir saman. Maður verður eiginlega mest feginn þegar lagið klárast og kappinn kveður.

Frá bjúrókratabákninu Belgíu kemur hljómsveitin Íshestar (Ishtar) með lagið sitt Æ, Júlíus (O Julissi). Þetta lag er eiginlega þannig að maður byrjar á því að leita að nunnunni sem söng Domminikkínikkínikk hér um árið en endar á því að bíða eftir Rósu Ingólfs. Þetta lag er alveg gjörsamlega í stílnum hennar Rósu. Þetta lag er alger tímaskekkja í þessari keppni, hundleiðinlegt og enn verður maður feginn þegar það klárast.

Frá þeim systrum Bosníu og (mega)Hertzegóvínu kemur söngsveitin Vorlaukar (Laka) og flytja þeir lagið Hvað viltu marga poka (Pokušaj). Einfalt landbúnaðarpopp í byrjun sem ekki grípur. Síðan breytist það í þungapopp með strengjasveit. Fólkið syngur eins og samkór Skítavíkur og Drulluháleistafjarðar og er bara ekkert gott. Lagið er einhæft og fremur leiðingjarnt til lengdar. Ég væri löngu farinn fram á klósett að pissa og tæki mér langan tíma í það!

Frá Búlgaríu koma Dagsson og Björgúlfur (Deep Zone & Balthazar) með Ísskápsssmellinn Dóri, teikaðu rollu á veginum (DJ, Take Me Away). Þrír furðulegir búlgarar sem einhver sleppti lausum í Reason og Fruity loops. Þeim tókst að eyðileggja græjurnar eftir því sem hljóðin gefa til kynna. Textinn er hins vegar mjög djúpur og heimspekilegur og ekki nema á færi færustu heimsspekinga að greina hann. Hann er svona:
When the night falls down I want you
DJ please take me away

And when the lights go down I need you
DJ please take me away

I’ll take you away

Take me away
Bjakk! Út með þetta!

Króatar senda Kjartan Unndórsson og 300 kall (Kraljevi Ulice & 75 Cents) með lagið Rjómaterta (Romanca). Þjóðlegt og skemmtilegt en búið að hlaða það með ólátum úr Lúðrasveit verkalýðsins og þremur ísskápum sem keppast við að dæla freoni út í lagið. Lag sem hefði alveg mátt halda gamaldags sjarma sínum. Ef ísskápunum verður hent þá vil ég sjá þetta lag fara upp úr undankeppni!

Kýpur sendir okkur föngulega snót sem heitir Eva Dóra Kúld (Evdokia Kadi) og syngur hún um Fimm á Fagurey (Femme Fatale). Skemmtilega þjóðlegt í upphafi en virðist eins og það ætli að fylgja ísskápum og skruðningum en snarhættir við það og verður að alvöru lagi. Lagið er hlaðið stemmningu og mig langar gríðarlega að fá mér í glas við að hlusta á þetta lag! Vel flutt og ég vil þetta upp!

Frá Tékklandi kemur söngkonan Þorgerður Kortsdóttir (Tereza Kerndlová) og syngur hún lagið Hávamál á Fróni (Have Some Fun). Lagið byrjar á ísskápum og Britneylegum stælum. Inni þetta er fléttað vanmáttugum austurevrópuáhrifum. Textinn er hræðilegur og lagið í alla staði drepleiðinlegt. Ekkert meira um það að segja!

Frá Danmörku kemur Sigursteinn Másson (Simon Mathew) og syngur hann lagið um Aðalstein Long (All Night Long). Lagið hefst á skemmtilegri gamalli upptöku af bigbandplötu. Síðan byrjar lagið fyrir alvöru þar sem lagið er heiltóni neðar en bigbandið og gott betur... einum og kvarttóni takk fyrir. Skelfileg byrjun. Hins vegar verður að segja dönum það til tekna að hér er um partýslagara að ræða og æðislegt singalong ALL NIGHT LONG! Þetta er nánast bókað upp.

Frá Eistlandi kemur sönghópurinn Krembrauðs-Ragnararnir (Kreisiraadio) með lagið Lúðusúpa (Leto Svet). Lagið hefst á skemmtilega grípandi gítarriffi sem fær svo yfir sig ísskáp og þokulúðra. Á endanum byrja svo þrír frekar ólagvissir kónar að rymja eitthvað sem ég held að sé eitt asnalegasta lagið í keppninni í ár. Illa sungið, illa útsett, illa gert og alveg rosalega illa séð í úrslitum!

Finnland sendir okkur drengjasveitina Tárabautar (Teräsbetoni) og flytja þeir okkur lagið Missti af messu í Reykjahlíð (Missä Miehet Ratsastaa). Finnar bregðast okkur rokkhundum ekki í þetta sinn. Þessir drengir syngja um karlmennsku og fantaskap og vildi einhver meina að titillinn gæti þýtt í sinni ísköldu tvíræðni „Hvar RÍÐA hetjur um hjeruð“. Hér er á ferðinni fantametal með öllum rokktrikkunum. Lordi hljómar eins og barnakór Kóraskóla í Kópavogi við hliðina á þessum föntum! Ég spái Finnum sigri í ár þrátt fyrir að þeir vinni ekki... mér finnst þetta bara flottasta stöntið!

Frá Frakklandi kemur Sigurjón Teitsson (Sébastien Tellier) og flytur hann angurvært lag um Dívaninn sinn (Divine). Nú held ég að frakkar hafi dottið all rækilega á hausinn. Þetta lag er eins og veitt upp úr ruslatunnunni hjá Pet Shop Boys á upphafsdögum þeirrar hljómsveitar. Frakkar fá reyndar kredit frá mér fyrir að syngja á ensku í þetta sinn. En söngfuglinn þeirra bítur höfuðið af skömminni með að hafa smá Lennon kafla í miðju lagi. Ónýtt lag verður enn ónýtara með því að reyna að líkja eftir Lennon með mjög misheppnuðum hætti. Frakkar eru furðuskepnur!

Makedónía býður upp á Tómasínu, Viðar og Arngeir (Tamara, Vrčak & Adrijan) og flytja þau lagið Þú varst búinn að lofa mér (Let Me Love You). Makedónar virðast engu hafa gleymt... og heldur ekkert lært. Þeir senda enn eitt sinnið hræðilegt lag með RUNK RUNK RUNK takti úr ísskápnum sínum. Lagið alltaf eins þó svo það sé reynt að lyfta því með einhverjum bakröddum þá er þetta bara flatara en Danmörk og Holland til samans!

Í Georgíu var valið lag með Dagnýju Geirsdóttur (Diana Gurtskaya) og lagið heitir Mér er mál (Peace Will Come). Vitiði, mér finnst ég hafa heyrt þetta lag áður... Frasinn SOMETHING'S GONNA CHANGE hljómar eins og mörg lög liðinna ára í ísskápapoppinu. Ekkert meira um þetta að segja en að þetta er ófrumlegt og eiginlega leiðinlegt.

Þýskaland hefur aldrei verið þekkt fyrir að senda góð lög eftir að Stephan Raab var með Wadda Hadde Dudde Da! Þjóðverjar eru ekkert að skipta um skoðun og senda kerlingasveitina Nálgunarbann (No Angels) og flytja þær lagið Ég er á perunni (Disappear). Hér eru þjóðverjar að míga nokkrum hektólítrum utan í Spice Girls, Britney Spears og öðrum vælukjóum. Ekkert frumlegt og ekkert skemmtilegt við þetta lag. Og mættu þær alveg hverfa eins og titill lagsins gefur til kynna.

Grikkland hendir í okkur söngkonunni Karlamagnúsínu (Kalomira) og flytur hún lagið Sekt á Kringlumýrarbraut (Secret Combination). Lagið byrjar eins og öll grísk júróvisjónlög undanfarinna ára á buzuki spili sem endar inni í ísskáp. Lagið minnir um margt á popptónlistina í ammríku og Bretlandi í kringum 2001 - 2002. Æ, hlífið mér!

Ungverjar senda okkur smjörva! Hún Sigyn (Csézy) flytur lagið Kanntu á lásinn? (Candlelight). Lag í anda Celine Dion og viðlíka grenjuskjóða. Nema hvað hún Sigyn syngur þetta bara ekkert sérstaklega. Útsetningin er svona kortér í þrjú... vonlaus og afskaplega þreytt. Komið með eitthvað betra næst eða verið úti!

Frá Íslandi kemur hljómsveitin Eyrnastór (Euroband) og flytur það lagið Þistilfjörður (This Is My Life). Landsmót ísskápa var haldið um leið og lagið var samið. Klisjur júróvisjón í gegnum tíðina eru notaðar og eiginlega fátt sem grípur nema ef vera skyldi helvítis viðlagið sem límist á mann eins og heftiplástur með of miklu lími. Afsakið að ég segi það en mér finnst þetta lag ekkert sérstakt og á ekkert frekar von á því að það fari upp úr undankeppninni nema ef vera skyldi fyrir þetta ágætis myndband sem búið er að setja saman við lagið. En sorrý, ekki gott lag. Ég vildi Dr. Spock!

Írland sparkar duglega í rassinn á þessari keppni. Þaðan kemur Draupnir úr Tómasarhaga (Dustin the Turkey) og flytur hann lagið Ýlfrandi dúfnapar (Irelande Douze Pointe). Írskur einkahúmor á hæsta stigi. Þetta er eiginlega eins og við myndum senda Glám, Skrám og Spaugstofuna. Lagið er kyrfilega stolið frá Ignis, Westinghouse og Whirlpool. Snargeggjaður ísskápur! Ég fíla ekki lagið og eiginlega vona að það verði sent heim með skítinn í rassgatinu en það þarf að sparka í þessa keppni engu að síður.

Frá Ísrael kemur Birgir (Boaz) og flytur hann lagið Þefurinn úr Eyjum (The Fire In Your Eyes). Hér er á ferðinni ísraelskt smjör. Angurvær ballaða með mjög lélegum texta. Þessi gutti hefur líklega verið geldur því honum liggur svo hátt rómur. Það er líklega verið að reyna að gera hetjuballöðu en það tekst ekki því hann verður svo kjánalega mjóróma og svo vantar hetjugítarinn. Það sem má samt segja þessu lagi til tekna er að þeir blanda smá þjóðlegu inn í það. Ég er ekki viss um hvar ég vil hafa þetta lag.

Frá Lettlandi koma prúðbúin ungmenni sem kalla sig Prelátar á Þórshöfn (Pirates Of The Sea) og syngja þau óðinn Vertu á Þórshöfn (Wolves Of The Sea). Eins gott að Barði fékk ekki að senda Mersedesklúbbinn sinn með hóhóhóvíseiheiheihei því þetta er svona hó og hei lag. Naumast hvað menn ætluðu að heyja þetta árið í Júró. Lagið hljómar eins og það sé fengið úr barnaleikriti. Ágætt svo sem til síns brúks og er þetta eitt af lögunum sem virkar inni í ísskáp. Ágætlega grípandi og verður gaman að sjá hvar það lendir.

Frá Litháen kemur Jónashannes Másson (Jeronimas Milius) og syngur hann um Norðmenn í teningakasti (Nomads In The Night). Tom Jones er kominn aftur í líki síðhærðs rokkara sem ákvað að snúa sér að óperu. Þetta er beinlínis hræðilegt. Lagið er eins og misheppnað Queen lag sem einhver gróf upp úr ruslinu og reyndi að syngja en er meira að góla. Vont vont vont!

Malta sendir okkur góðtemplarastúlkuna Margréti (Morena) og syngur hún um Vagna (Vodka). Möltuballaðan þetta árið er sett á 78 snúninga og hefst á orðunum NASTROVJA, HEY HEY HEY! Einfalt lag en bráðskemmtilega útsett þó svo það sé í hraðfrystiísskáp. Hljómasetningin í bakröddunum í viðlaginu er skínandi góð. Söngkonan gerir þetta vel og er lagið skemmtilega kjánalegt. Það fer áfram, það er nokkuð ljóst.

Moldóva teflir fram Guðrúnu Bjarnadóttur (Geta Burlacu) með lagið Sendur upp á loft (A Century Of Love). Svolítið djassað lag í kaffihúsastíl. Ágætis útsetning en lagið eins og samsuða úr átakaminnstu lögum Stevie Wonder. Lagið flutt á heimamálinu og fá þeir kredit þar en mér þykir það frekar aumt.

Svartfjallaland ýtir Sveinbirni Friðrikssyni (Stefan Filipović) með lagið Svakalega vil ég te (Zauvijek Volim Te). Svei mér þá... ef ég vissi ekki betur þá hefði maður haldið að Gummi úr Sálinni hefði samið þetta lag. Skítsæmilegt lag. Gítarar, bassi, trommu og hljómborð. Gospillukór á bakvið og gítarsóló. Lagið nær samt aldrei einhverjum hæðum þó svo að útsetningin bjóði upp á það. Kannski er það blessaður söngvarinn sem hljómar eins og enn einn Tomdjónsinn. Ófrumlegt og lítið í þetta varið.

Holland sendir okkur söngkonuna Gimbur (Hind) með lagið Jú, heyrðu bíla-Tommi (Your Heart Belongs To Me). Nú eru Hollendingar á klósettinu að pissa utan í Tyrki og aðra austanmenn. Fullt af hljóðfærum og elementum úr tyrkneskri tónlist í laginu ásamt því að vera vestrænt. Ágætur söngur, fín útsetning en lagið finnst mér frekar flatt og ekki vera neitt nema blaðra sem springur áður en hún er blásin upp að fullu.

Noregur ryður fram söngkonunni Marsibil (Maria) sem syngur okkur lagið Holdið er stórt (Hold On Be Strong). Ekki ætla ég Norðmönnum að rúlla núllinu heim en þeir held ég að verði ekki langt frá því. Þarna er lag sem hefur ekkert við sig, ekki einu sinni útsetningu. Viðlagið er ekki nægilega grípandi og ... ekkert. NEJ DET ER STENGT!

Pólland sýnir okkur söngkonuna Írisi Geirs (Isis Gee) og syngur hún lagið Forlagið (For Life). Rosalega langar þessa konu að vera Celine Dion. Lagið er úr þeirri áttinni og er eiginlega stolið frá öllum ballöðusöngkonum vesturlanda, hvaða nafni sem þær nefnast. Ekkert, ég segi ekkert spennandi við þetta lag!

Portúgal hefur aldrei riðið feitum hesti frá þessari keppni og samt er það alltaf með. Þetta árið er ekki von á neinni breytingu þar á. Söngkonan heitir Vigdís Finnbogadóttir (Vânia Fernandes) og syngur hún lagið Snaraðu maður (Notaðu augun!) (Senhora Do Mar (Negras Águas)). Þetta lag er heldur ekki neitt neitt... nema hvað útsetningin er bitastæðari en sú pólska. Það er líka meira þjóðlegt við þetta lag en þar með er líka upp talið sem þetta lag hefur. Söngur falskur áköflum og því kvíði ég beinlínis fyrir að heyra það live.

Frá Rúmeníu koma þau Nína og Veigar (Nico & Vlad) með lagið Fáðu Margeiri Ljómann. (Pe-o Margine De Lume). Ósköp er þetta þunnur þrettándi. Karlfauskur sem hefur greinilega lært að syngja í hálft ár og er góður með sig og stelpa sem vill vera Celina Dion. Neitakk. Smjör, sykur, leðja og annað slíkt ógeð. Jújú, það er voða gaman að vel fluttum lögum í þessum dúr en þetta er það ekki. Ef þetta væri röðin á lögunum í keppninni þá væri ég líklega kominn upp á Langjökul með leiðinlega bók og skemmti mér mun betur þar.

Rússar senda okkur Davíð Brjánsson (Dima Bilan) og hann syngur um Bílinn (Believe). Óskiljanlegur texti í algerlega hundleiðinlegu lagi. Hér er líklega komið leiðinlegasta lag í heimi. Ég nenni ekki einu sinni að dæma það betur!

San Marino telst mér til að séu með í fyrsta sinn núna. Þaðan kemur hljómsveitin Milta (Miodio) og flytur hún lagið Klámvísa (Complice). Angurvært rokklag sem í raun er ekkert meira en rússagrýlan á undan en samt er meira líf í þessu lagi og meira varið í útsetninguna. Söngurinn mun betri. Þetta verður ekki ofarlega. En fyrst að San Marino er með þá getur varla verið langt að bíða þess að páfagarður sendi keppanda.

Gestgjafarnir, Serbar, sækja Jódísi Tumadóttur og Baldur Dofrason (Jelena Tomašević feat. Bora Dugic) og flytja þau lagið Ófrið (Oro), Lag þetta er ekki bara keimlíkt heldur sláandi líkt laginu Nocturne sem Norðmenn sigruðu með 1995. Afskaplega fallegt lag og vel útsett. Þetta er það lag í keppninni þetta árið þar sem sungið er núnanúnanei. Alltaf eitt svoleiðis. En þetta lag þykir mér mjög líklegt til árangurs en ekki til sigurs. Serbar virðast vera að fatta trixin. Vera öðruvísi en gera það vel.

Úr henni Slóveníu kemur Ragnheiður Dómaldsdóttir (Rebeka Dremelj) og syngur hún Faktin sú sama (Vrag Naj Vzame). Miðlungslag með fínni útsetningu. Afskaplega líflegt og jafnvel líklegt til árangurs. Eitthvert slóvenskt búzukí brúkað af miklum eldmóð en samt ekki of mikið. Reyndar er brúin í laginu pínulítið út úr kú en gæti samt komið laginu lengra. Ég segi að þetta fari upp.

Spánn sendir okkur áhugavert lag. Það er Reynir Kristjánsson (Rodolfo Chikilicuatre) sem flytur Verum öll í Kristi, Kristi (Baila El Chiki Chiki). Upphaflega útgáfa lagsins var hræðileg. Skerandi byrjendahljómgerfill og svo þessi karlfauskur mjög illa mixaður inn á. Laginu hefur vaxið fiskur um hrygg. Upphaflega var það bara tveir hljómar endurteknir í sífellu en það var ein og hálf mínúta sem var fyndið. Þetta var eiginlega svo pirrandi að það var orðið rosalega fyndið að hlusta á það. Nú er búið að skella mýkri hljómum á lagið og þægilegri takti og karlinn hefur dempað sig en hann röflar sama textann á spænsku. Ég held að þetta lag eigi eftir að sigla upp út á fíflaganginn.

Frá Svíþjóð kemur kunnuglegt andlit. Kristlaug Pétursdóttir (Charlotte Perrelli) og flytur hún lagið Hörður (Hero). Sæmilegt popplag en maður getur ekki varist að heyra að þetta er enn ein útvötnunin á Abba. Bakraddirnar eru þannig, beatið er þannig, undirleikurinn ber allur keim af Abba. Smá diggeloo diggeley í útsetningunni en annars frekar fátæklegt lag. Vonum að hún steli ekki sigrinum í þetta sinn frá okkur... reyndar sigrum við ekki því við komumst ekki upp úr undankeppninni... en hvað um það, Svíar með leiðinlegt lag.

Frá Sviss kemur Pétur Magnússon (Paolo Meneguzz) og raular hann lagið Er í stafsetningu (Era Stupendo). Ítali sem smyglaði sér til Sviss því ítalir fóru í fýlu fyrir mörgum árum og hættu í keppninni. Lagið fer hægt af stað sem ballaða og svo allt í einu kemur einhver með startkaplana á það og það breytist í lag sem gæti átt heima í lögguþætti. Ágætis lagasmíð svo sem og útsetningin svolítið sjónvarpseighties en prýðileg samt. Ég spái þessu lagi samt ekkert sérstöku gengi.

Frá Tyrklandi kemur sveitin Már og Örlygur (Mor ve Ötesi) með lagið Fáviti (Deli). Þetta er skemmtilegur rokkslagari með flottri hljómasetningu í versunum og grípandi viðlagi. Takk fyrir, nú erum við loksins komin með lifandi lag. Þetta hefur keim af Tyrkneskri þjóðlagahefð en er samt rokk í háum gæðaflokki. Tyrknesk áhrif í fjórum fjórðu með rifnum gítar... þetta er prýðilegt. Upp með þessa drengi!

Frá Úkraínu fáum við Ísskápsdömu að nafni Arnheiður Lúðvíksdóttir (Ani Lorak) með lagið Sveinn á Leiti (Shady Lady). Úkraínumenn senda lag sem er óskaplega dansvænt eins og langflest lögin í keppninni en þetta lag er mjög mikið Abba. Þeim tekst reyndar að útbúa stef á þjóðleg hljóðfæri sem rúlla átakalaust undir af og til en ekkert sérstakt lag. Ég hef enga trú á þessu lagi.

Bretar senda okkur eiginlega fingurinn með því að senda lag sem virðist vera frá 1977 með dash af Wham. Það er Aðalgeir Ásgeirsson (Andy Abraham) sem flytur lagið Efnalíf (Even If). En þrátt fyrir að við fáum fingurinn frá þeim þá er þetta lag miklu betra en margt í þessari keppni. Vel sungið og allt það en útsetningin er slöpp. Það er ekkert áberandi ísskápur í þessu lagi heldur meira svona eins og verið sé að berja sautjándajúníblöðrur. Þetta lag á þó nokkra möguleika á Top 5 verð ég að segja.

Nú hef ég farið yfir öll lögin í keppninni og gagnrýnt þau. Þau lög sem ég fíla best úr þessu eru lögin frá Finnlandi og Tyrklandi. Þau lög sem ég fíla verst eru frá Þýskalandi og Rússlandi. Svo eru mörg arfaslök.

Það er víst best að útskýra núna hvað ég á við með öllu þessu ísskápatali. Einu sinni átti ég ísskáp sem bilaði. Það losnaði um eitthvað og hann fór að hljóma eins og taktur í einhverju dómadags trommuheiladanstripphoppeitthvað lagi. Mikill ísskápur þarf ekkert að vera neikvætt en mér þykja svoleiðis lög alltaf mjög líflaus. Alvöru spilamennska finnst mér alltaf kostur en ekki alltaf!

Njótið heil!

   (76 af 287)  
4/12/07 18:00

Bleiki ostaskerinn

Þú ættir kannski að skella þér í júró með með gamala ískápinn.

4/12/07 18:00

Herbjörn Hafralóns

Takk fyrir þessa ágætu samantekt. Gott að hafa aðgang að þessum upplýsingabrunni þegar farið verður að kynna lögin.

4/12/07 18:00

Dula

Íbbi minn, hættu þessari neikvæðni og fáðu þér blút, sendu svo baggabandið næst.

4/12/07 18:00

Galdrameistarinn

Ég hef áhyggjur af þessum ískápsfetis hjá þér Íbbi minn.

4/12/07 18:00

krossgata

Íslenska hörmungin er ekki þarna.

4/12/07 18:01

Ívar Sívertsen

Víst! Hljómsveitin Eyrnastór!

4/12/07 18:01

Dula

ég kalla ísskápssyndromið alltaf þvottavélina með steininum í, [glottir einsog hálfviti]

4/12/07 18:01

krossgata

Já, sé það núna. Þú átt við þennan brúna heftiplástur sem allir þekkja. Hræðilega ofnæmisvaldandi. Ég fékk einmitt ofnæmi strax.

4/12/07 18:01

Lopi

Æ skelfing vildi ég að ég hefði tíma til að pæla í þessu. Gott samt að vita af þessari samantekt.

4/12/07 18:01

Huxi

[Hrökklast verulega afturábak og hrasar á breiðann botninn]
Þetta er vissulegta frábær samantekt, en þú hefur greinilega allt of mikinn frítíma. Gengur ekkert að fá vinnu?

4/12/07 18:01

Oddur frændi

Leitt að sjá að þig skortir vinnu. Áhugaverð úttekt engu að síður.

4/12/07 18:01

Skabbi skrumari

Jæja... Ívar minn, ertu til í að kíkja í heimsókn og flokka fyrir mig frímerkjasafnið mitt... ég hef ekki haft tíma í það síðan ég var 13 ára...

4/12/07 18:01

Upprifinn

Það er full ástæða til að við hér tökum okkur til og förum út að leita að vinnu fyrir þig kallinn minn.

4/12/07 18:02

Kargur

Liggur ekki beint við að þú farir í Íslenzku dómnefndina? Eitthvað hlýtur það að gefa í aðra hönd, þó tímabundið sé.

4/12/07 18:02

Kargur

Og fyrst þetta á að vera í stafrófsröð; af hvurju er Þýzkaland með géunum? Þar sem þú hefir nógan tíma, er til of mikils ætlast að þú raðir þessu í stafrófsröð eftir að þú hefir Íslenzkað löndin?

4/12/07 18:02

Ívar Sívertsen

Eins og ég sagði "enskri stafrófsröð vegna þess að þau eru þannig á júróvisjónpúnkturtjevaff"

4/12/07 18:02

Kargur

Fyrst þú hefir nægan tíma til að hlusta á og meta þennan ófögnuð, þá reikna ég með að þú hafir nægan tíma til að raða þessu í Íslenzka stafrófsröð. Stafrófið má finna á ýmsum stöðum.

4/12/07 19:00

Jóakim Aðalönd

Þú verður hér með kallaður Ívar eltiskinn, eða Ívar upplýsingabrunnur. Nú eða Ívar snigill. Mig dreymdi að ég væri gamall. Mér fannst ég vera hneta.

4/12/07 19:00

Ívar Sívertsen

Ha?

4/12/07 19:00

Z. Natan Ó. Jónatanz

Þarfleg & allskemmtileg úttekt; kemur eflaust að góðum notum í fyllingu tímans.

4/12/07 19:02

Skreppur seiðkarl

Verst hvað þetta er ofboðslega leiðinlegur dagskrárliður. Þarna eru svo mörg lög sem eru svo leiðinleg að skemmtilegra væri að strokka smjör. Betra að horfa bara á klámmynd og dúnka kellinguna...

4/12/07 20:00

Ívar Sívertsen

Það eru 2 lög þess virði að hlusta á. Ég fer með einhverja leiðinlega bók á langjökul og les þar!

4/12/07 22:01

Álfelgur

Viltu ekki staura kellinguna í leiðinni Skreppur [Blótar herfilega og rífur hár sitt fyrir hönd eiginkonu Skrepps]

Ívar Sívertsen:
  • Fæðing hér: 11/8/03 12:21
  • Síðast á ferli: 22/6/23 12:25
  • Innlegg: 12356
Eðli:
Ákaflega fagur ungur maður með mikinn metnað og kann sig á allan hátt. (hann lærði það á kvöldnámskeiði hjá Bréfaskóla SÍS)
Fræðasvið:
Ég veit allt, get allt og kann allt en fer rosalega leynt með það og kann að fela það vel.
Æviágrip:
[i]Fæddur að handraðanesi á sóðbrókarströnd í Ristilfirði. Lést skömmu síðar. Reis upp frá dauðum eftir korter og bað um brauð. Eftir það var ekki aftur snúið. Hann hefur síðan verið ánetjaður Baggalúti og virðist ekkert vera að skána.Hann fékk sér fæðingarblett á kinnina skömmu áður en hann lét taka hann af sér. Hann hló skömmu eftir það. Ívar hefur nú hafið búskap á Eyðibýli á Auðkúluheiði. Hann hefur aldrei verið við kvenmann kenndur en hann er all oft kenndur. Sívertsenættin hefur lýst hann útlægan og krafist þess að hann afsali sér ættarnafninu og taki upp nafnið Nestrevís en hann hefur margsinnis hafnað því. Ef þú ert að lesa þetta ennþá þá ert þú líklega jafn skemmdur og Ívar... ef ekki skemmdari barasta. Ertu enn að lesa? Nei nú læt ég leggja þig inn á geðdeild! Það er ekki heilbrigt að lesa svona langt! Viltu hætta þessu! HÆTTU SEGI ÉG!!! Ef þú ert enn að lesa og finnur ekki fyrri vott af þreytu þá skal því bætt við að þegar Gestapó var opnað í árdaga þá gerðist Ívar fastagestur hið snarasta. Hann hefur æ síðan verið einn virkasti gestapóinn og ritað mikið. Hins vegar er ljóst að hann kemur til með að auka viðveru sína á Gestapó á komandi árum því nú hefur hann komið sér í innivinnu við tölvu. Ertu enn að lesa þetta? ÉG held svei mér að þú ættir í alvöru að leita þér hjálpar. Ég er löngu hættur að lesa þetta... ég veit ekki einu sinni hvað stendur eftir línu þrjú. En hvað um það. Síðan hafa mörg vötn runnið til sjávar og eiginlega svo mikið að það er ekkert salt eftir í sjónum, það lagði á flótta upp í ár og stöðuvötn þannig að nú er sjórinn pakkfullur af ferskvatnsfiskum og ferskvatnshvölum. En það bar til um þessar mundir, að boð kom frá Megasi keisara, að skrásetja skyldi alla drykkina. Þetta var fyrsta skrásetningin og var gjörð þá er Gylfi Ægisson var blandstjóri í Stúdjó Sýrlandi. Fóru þá allir til að láta stjaksetja sig, hver til sinnar borgar. Þá fór og Rúnar Þór úr Litlu Hraunum frá Hótel Borg upp í Morgunblaðshús, til borgar Davíðs, sem heitir Hádegismóar, en hann var af ætt og kyni Davíðs,að láta skrásetja sig ásamt Maríu hjákonu sinni, sem var þung. En meðan þau voru þar, kom sá tími, er hún skyldi verða léttari. Ældi hún þá bjór sinn frumdrukkinn, sagði hann vondan og lagði hann í fötu, af því að eigi var romm handa þeim í gistihúsi. En í sömu byggð voru barþjónar úti í haga og gættu um nóttina drykkja sinna.Og vörður laganna stóð hjá þeim, og dýrð Áfengis ljómaði kringum þá. Þeir urðu mjög fullir, en löggimann sagði við þá: Verið óhræddir, því sjá, ég boða yður mikinn fögnuð, sem veitast mun öllum lýðnum: Yður er í dag afréttari færður, sem er Hristur og hrærðu, í Mogga Davíðs.Og hafið þetta til marks: Þér munuð finna gubb vont, lagt í fötu. Og í sömu svipan var með löggumanninum fjöldi himneskra hljómsveita, sem lofuðu stuð og sögðu: Dýrð sé stuði í Hádegismóum, og fiður á Davíð og mönnum sem hann hefur velþóknun á. Þannig hljóðar hið heilaga stuðspjall. Og þegiðu svo!