Ég vil biðja Baggalút um að koma því á framfæri við fyrirtækið sem ég vinn hjá. Að gefa mér umfangsmikla kauphækkun.
Því ég hef tekið eftir því upp á síðkastið að það sem að ég fæ í laun finnst mér ekki nægjanlegt lengur. Eftir að ég keypti mér þessa þrjá bíla og tvö einbýlishús sá ég að það lítið var eftir af launaseðlinum að ég gat ómögulega keypt mér annan bíl.

Hvernig á maður að fara að því að eltast við þennan velmegunarleik ef að launaseðill mánaðarins rétt nægir til að kaupa þrjá bíla og tvö einbýlishús. Þetta er gjörsamlega ófullnægjandi. Það er engu líkara en að ég sé nú orðinn láglaunamaður. Hef ekki efni á meira dóti. Get ekki keypt mér innbúið í þessi einbýlishús...

Það er orðið sárt að horfa á launaumslag sitt. Ég sé ekki fram á það að ég geti staðið í þessari velmegunarkeppni mikið lengur þar sem að fleira og fleira fólk fær sér fleiri og dýrari bíla. Nei nú er bilið að verða of mikið.

Mér finnst að launaumslagið ætti að hækka sjálfkrafa eftir því sem verð á íbúðum og bílum hækkar.

Látið yfirmenn mína vita af þessu sem allra fyrst!