Í garðinum heima standa gömul tré
sem grænkuðu í dag eins og ekkert sé
– því vorið er komið í Reykjavík.

Sólin er einráð við Austurvöll,
af og til má heyra þaðan hlátrasköll
– því vorið er komið í Reykjavík.

Og gengið það seig þennan sólardag.
Gengið seig í dag.
En reynitrén þau redda mínum hag.

Ég naut þess að keyra í Nauthólsvík
með nýgjaldfallið bílalán á gamalli tík
– því vorið er komið í Reykjavík.

Vornæturdöggin er ljóði lík,
langar mest að gleyma allri pólitík
– því vorið er komið í Reykjavík.

Og gengið það seig þennan sólardag.
Gengið seig í dag.
En reynitrén þau redda mínum hag.

Engu lengur treysti – allt ég svík,
alveg sama hver er töff og hver er frík
– en vorið er komið í Reykjavík.

Hversdagurinn grár eins og gömul flík
gleymist þegar kvöldin eru slík
– og vorið er komið í Reykjavík.

Og gengið það seig þennan sólardag.
Gengið seig í dag.
En reynitrén þau redda mínum hag.