Hljómleikar Sniglabandsins í Borgarleikhúsinu 23.10. 2007
Tilefni þess að Sniglabandið hélt þessa tónleika er útkoma nýjasta disks sveitarinnar. Sá ber nafnið Vestur og inniheldur lög sm þeir Sniglabandsmenn sömdu eftir uppskriftum hlustenda Rásar 2 í fyrrasumar.
Fyrir tónleikana skemmtu 3 spunaleikarar sem kölluðu sig Gæt að baki mínu, upp á ensku. Það mátti glotta út í annað að trúðslátum þeirra en þó var ég frekar feginn þegar þeir hættu loddaraleik sínum og hurfu af sviðinu.
Sniglabandið steig þá á svið ásamt 4 lúðraþeyturum, 2 bakraddasönvurum og Ásgeiri Óskarsyni á slagverk. Þeir hófu leik á titillagi disksins og gáfu tóninn fyrir skemmtun kvöldsins með afslöppuðum og vönduðum flutningi. Lögin sem þeir settu á Vestur eru í afar mismunandi stíltegundum og mátti heyra þetta kvöld afar fjölbreytta tónlist. Þarna voru ljúfsárar poppballöður, hraður polki, hefðbundið íslenskt sveitaballarokk og eitt lagið minnti mig helst á Sir Duke með Steve Wonder! Allt var þetta flutt með hæfilegu kæruleysi og fádæma spilagleði. Í varnaðarsöng gegn ölvunarakstri, sem saminn var í anda Johnny Cash, söng Hjördís Geirs með þeim, og í smellinum Britney stukku Nylon stelpurnar á svið og stóðu sig vel.
Hljómsveitin tók einnig nýrri, óútgefin lög og gömlu lögin afgreiddu þeir í syrpu sem fékk margan gamlan aðdáandann til að klappa saman lófunum og rugga sér í lendunum.
Einar Rúnarsson orgelleikari Sniglabandsins er, að margra áliti, fyndnasti maður landsins og það var ekki laust við að hann sannaði að með einsöng sínum í 2 lögum. Annað var Thrasmetalsöngur að hætti Gylfa Ægissonar, og það lá við að undirritaður þyrfti áfallahjálp eftir þann flutning. Einnig söng hann ástaróð til lungasjúkrar stórreykingakonu á Heilsuhælinu í Hveragerði og kom fram sem landflótta jasspíanisti frá Kína. Salurinn veltist um af hlátri.
Það skyggði örlítiið á gleði mína að 2 síðustu lögin fyrir uppklapp voru bæði samin eftir uppskrift færeyingsfíflsins sem á að vera mér til aðstoðar hér á kontórnum. Fyrra lagið er Klesmher-gyðinglegur brúðkaupssöngur og var vissulega stórbrotin lagasmíð þar sem lúðrasveitin fór á kostum. Og síðasta lagið var Lennonlegt epískt verk og þar kom Barnakór Kársnesskóla þeim til aðstoðar. Sannarlega stórbrotinn endir á frábærum tónleikum.
Það er engin hljómsveit sem kemst neitt nærri Sniglabandinu þegar kemur að því að spila fjölbreytta afslappað fyndna og kabarettkenda tónleika. Og orð Bo Halldórs, Sniglabandið - Stuðmenn fátæka mannsins eiga ekki við lengur, þessir tónleikar sönnuðu það.
Aldrei hættir Sniglabandið. Fyrir mér eru þeir svolítið eins og Spaugstofan, komnir 15 ár fram yfir vitjunartíma sinn.
Hvaða endemis vitleysa Hakuchi, sniglabandið eru unaðsleg blanda af vitleysu og hæfileikum sem dettur sko aldrei úr tísku. Ég hefði svo sannarlega farið á þessa tónleika hefði ég bara vitað af þeim.
Það hefði verið gaman að komast á þessa tónleika, en eitthvað segir mér að ég muni nú eiga þess kost að komast fyrr eða síðar.
[Íhugar að skreppa til Óðinsvéa og snúa upp á handleggina á Skúla]
Þarna vantar Þ. [rReynir að lemja færeyinginn fyrir óvandaðan prófarkarlestur. Hittir ekki ]
[Grípur færeyinginn og sparkar þorni í stafsetningarholuna á honum]
Grunaði það. Þá verð ég að segja að ég er mjög forvitin. Hvernig sannaði maðurinn að hann sé fyndnasti maður Íslands með söng sínum? Syngur hann svona illa að það er brandari að hlusta á hann?
Flutningur hans var einfaldlega afspyrnu fyndinn. Að reyna að lýsa fyndni þessari er svipað og að reyna að lýsa bragðinu af soðinni ýsu með kartöflum og sméri, fyrir manni sem aldrei hefur smakkað ýsu.
Ekki hef ég heyrt neitt af þessum diski, svo ég viti til, en „Jólahjól“, „Éttu úldinn hund, kona“, og Rússlandsferðar-lagið koma mér alltaf í gott skap.