-Um uppruna Röflskúfa.

1. Hluti.

-Greining og lýsing.

-Röflskúfar eru af ætt hamapa. Þeir eru belgstórir, hálsdigrir og raddmiklir. Höfuð er kubbslegt, augu útstæð og mislit. Augabrúnir útvaxnar og vel loðnar, nef fremur stutt en breitt án miðsnes og flatt. Eyru eru uppmjó en liggja lágt og falla vel að höfði. Munnur er stór og vel tenntur, jaxlar eru 22. (það þarf ekki að koma á óvart þar sem Röflskúfar eru jórturapar) Tunga er stór og klofin. Andlit er þakið rauðbrúnu hári, haka er vaxin löngum eldrauðum hárskúf, en hvirfill er hárlaus og bleikur.
-Frambolur er sterklegur, breiður og alsettur brúnu hári. Framlimir eru 2. stuttir og með 6 fingur.
-Afturbolur er mjaðmamikill, gumpur er stór og rauðleitur. Ganglimir eru 2. grannir, stuttir og með 6 smágerðum þófum. Æxlunarfæri eru ekki sjáanleg útvortis.

-Atferli.

-Þann tíma sem ég hef fylgst með Röflskúfum hafa þeir ekki sýnt af sér merki um verulega grimmd. Nema blaðberar mega varast þá. Þeir eru glaðsinna og félagslyndir, spjalla mikið sín á milli og tala þokkalega íslensku, þeir eru örlítið gormæltir en tala afskaplega hratt. Þeir verja miklum tíma í þrif og snyrtingu hver á öðrum. –Þeir neyta matar saman í hópum og éta allt jurtkennt sem þeir komast yfir, til þess að bæta meltinguna éta þeir dagblöð og þá helst Moggan eða Dimmalætting af mikilli áfergju, þeir fúlsa við litprentuðum auglýsingablöðungum. Þeir þinga mikið, og virðist nokkurskonar þvingað lýðræði vera til staðar meðal Röflskúfa. Svipað því kerfi sem þekkist á Íslandi. Trúarbrögð Röflskúfa eru stjórnmálalegs eðlis, líkjast frjálslyndri nýhyggju með áherslu á markaðsöflin, og sækja þeir messur hjá löglærðum Röflskúfum sem þeir tilbiðja. (Mér þykir ástæða til að taka það fram að ég er ekki að lýsa neinu íslensku stjórnmálaafli þó svo mætti ætla.)
-Fjölskyldumynstur Röflskúfa er sérkennilegt, -en mér virðist sem stærð og litstyrkur gumps ráði fjölda maka, og gildir þá einu hvort Röflskúfurinn er karlkyns eða kvenkyns.
En kynin eru það lík að nánast ógerningur er að greina á milli þeirra, karlskúfar eru þó heldur hlédrægari en kvenskúfar.

-Uppruni.

-Röflskúfar koma upprunalega frá Madeira, en bárust hingað til lands með Jörundi Hundadagakonungi og voru honum ráðgefandi með stjórnskipulag og trúarbrögð þann stutta tíma sem hann dvaldi hér. Nokkrir urðu eftir, þeir settust aðallega að í Hraungerðishreppi og Holtunum í Reykjavík, auk þess sem nokkrir hröktust austur á Vopnafjörð og til Hafnar í Hornafirði.