Þá sjaldan það gerist að hugsun á mig herjar
hef ég mig allan við, við að pakka henni inn.
Því mikilvægt tel ég að farið sem hana ferjar
fagurt sé á að líta, sem ungmeyjar kinn.

En hugsun mín reynist oft hálf, eða þaðan af minni
og hverfur mér sjónum er flúrinu bæti ég við,
svo hending það reynist að einhver af henni finni
örlítið brot sem að fær hann af nokkurt mið.

Og því er það svo að umbúðirnar einar
oft hef ég látið frá mér með slaufu og hnút,
en innihaldið oddhvassir verið steinar
sem eingöngu valda þér skaða er þú tekur þá út.