Foreldrar mínir litu inn áðan, svona til þess að sjá hvurnig amerískt jólaglingur tekur sig út í stofunni hér. Þau höfðu fyrr í dag komið við á stað sem var með skötu á boðstólum. Jakki föður míns bar þess þögult vitni.
Skömmu eftir að þau gengu í bæinn fór konan mín að hnusa eitthvað út í loftið. Svo spurði hún dætur okkar hvort þær hefðu gert eitthvað stórt í brækurnar. Þær harðneituðu því. Konan gafst ekki upp, fannst augljóst á lyktinni að eitthvað hrikalegt biði hennar í bleyjum dætranna, og leitaði af sér allan grun. Þá var ég sakaður um að hafa leyst vind. Ég hélt nú síður. Þá fór frúin að gjóa augunum illilega að föður mínum. Þá var útskýrt fyrir henni hvurnig var í pottinn búið.
Frúin hafði nú ekki mikið álit á Íslenskri matarmenningu fyrir, en nú hefur hún nánast ekkert álit á henni.