Hleyptir þú honum svo fram fyrir þig?

Við ætluðum að hafa það svoleiðis en á síðustu stundu barst honum símtal sem var greinilega beiðni um að kaupa eitthvað. Þannig fór svo að ég gætti körfunnar hans á meðan hann hljóp eftir því en þá var akkúrat komið að okkur á kassanum. Ég endaði því á undan...

Snilld! Ég hef lent í þessu líka. Ég skellti mér í röðina með tóma körfu og konan fyrir aftan mig féllst á að ýta henni áfram.

Veistu Ísdrottning, mér finnst þetta flott hjá þér.

Þú semsagt svindlaðir þér (með daðri og fleðulátum) á undan minna kynferðislega kósí konum - stalst plássi í röðinni - meðan aðrir þurfa að láta sér lynda að bíða! Aldeilis eitthvað til að stæra sig af!

Segi bara svona, auðvitað er alltaf gaman að pikka fólk upp í kjörbúðum, og samvinna er alltaf góð - en það er hægt að horfa á þetta frá ýmsum hliðum...

Ég lít á þetta sem byrjun á feiknamiklu ástarævintýri. Ætli drengurinn sé ekki kominn á sama tíma að viku að bíða þín til að ná nafninu þínu

Það er þá enn til greiðvikið fólk. Ég lendi að vísu alltaf í röðini sem verður vesen í, svona vantar verð og fólk sem þarf að borga í klinki, skipta upphæðini og fá reikning fyrir.

Ég segi eins og Nermal að röðin, sem ég lendi í gengur alltaf hægast og ef ég færi mig í aðra röð, flyst hægagangurinn bara þangað líka.

Þó þetta sé sannarlega greiðvikni hjá unga manninum og kurteisi þá held ég að þetta hafi ekkert verið kurteist gagnvart þeim sem hafa staðið fyrir aftan í röðinni.

Hér er athyglisverð siðferðisspurning. Á að hrósa unga piltinum fyrir hjálpsemi við aðra manneskju, eða á að skamma hann fyrir að hafa gefið hinum í röðinni langt nef?

Ef við tökum kantíska pólinn í hæðina þá ættum við að hugsa málið til enda sem almennt lögmál, þ.e. ef allir myndu stunda svona nokkuð. Ég er ekkert viss um að það sé sérlega sniðugt. T.d. myndu pör fara inn í búð, einn aðilinn myndi rjúka í röð og hinn myndi tína saman vörurnar. Nei þetta gengur ekki og getur varla talið siðlegt, svona kantískt séð amk.

En er þetta siðlegt út frá siðfræði Mills, sem gegnsýrir (blessunarlega) vestræna hugsun? Svarið við því er þvert nei. Millsíska skoðunin er í stuttu máli þannig að þér er frjálst að gera það sem þér sýnist svo framarlega sem það kemur ekki niður á öðrum. Þarna fór manneskja í röð sem þurfti ekki að vera í röð, fór burt að versla meðan vitorðsmaður heldur kerru. Skaðinn er augljóslega þeirra sem voru fyrir aftan; aukaleg tímaeyðsla og að ég tali nú ekki um almennt ergelsi.

Afar athyglisvert.

Hin hliðin á málinu eins og það snýr að mér var sú að prinsessan beið heima sárlasin með háan hita.

Á móti má segja það sama um þá sem urðu að bíða lengur. Vogun vinnur, vogun tapar.

Þegar hjón fara saman út að versla á álagstíma er það ávallt svo að annað stendur við kerruna í röðinni á meðan hitt sækir það sem kaupa á. Slíkt er daglegt brauð í Bónus, af hverju ætti ég þá að skammast mín eða vera með samviskubit yfir því að bjarga mér á þennan hátt?

Ég hef ekki orðið sérstaklega var við þessa iðju hjá hjónum verð ég að skrifa. Og ef einhver hjón stunda slíkt eru þau undir sömu sök seld að sjálfsögðu. Amk. ef miðað er við kantíska og millsíska siðferðisvitund.

Prófaðu að fara í Bónus í Smáranum milli 17 og 18 fimmtudaga, föstudaga og jafnvel laugardaga. Sérstaklega fyrir stærri helgar.
Vinkonur og hjón gera þetta svona og engum þykir neitt athugavert við það. A.m.k. hef ég aldrei orðið vör við að það sé sagt neitt við þá sem slíkt stunda. Ég hef hins vegar oft öfundað þá sem hafa tök á að margmenna svona í innkaupaferðirnar.

Bezt er að gera magninnkaup á fimmtudegi eða jafnvel fyrr til að sleppa við raðir. Þá þurfum við ekki að hafa áhyggjur af Kant og Mills.

Ég er nú yfirleitt í Bógus á háannatíma en ég hef aldrei tekið eftir þessu en á móti hef ég hef oft verið sakaður um takmarkaða athyglisgáfu og gæti það átt við hér.

En vont er og siðlaust, ef satt er.