Það lá við hlátri er ég át morgunverð minn í fyrradag við lestur á Fréttablaðinu. Þar var á forsíðu neðst grein um að samræmda prófið í Stærðfræði hefði verið frábrugðið því sem Námsmatsstofnun hafði áður upplýst stærðfræðikennara um að það myndi verða. Svo var viðtal við einhvern karlskrögg hjá Námsmatsstofnun og einhver innskot frá kennaradrós við einn okkar skitna almenningsskóla.

Alltaf eftir hverja einustu prófarunu samræmdra prófa á vorin hafa kennarar eitthvað til að setja útá sem að nemendur þeirra geta tekið inná sig til að nota í blekkingu sinni til að réttlæta t.d. slæmt gengi þeirra á einhverju tilteknu prófi. Þetta sé allt vondu köllunum hjá Námsmatsstofnun að kenna. Nóg er komið af slíkri þvælu og það er kominn tími til að félagsmiðstöð reykjavíkur grípi í taumana á þessum málum og hafi aga á starfsfólki sínu í grunnskólum borgarinnar.

Samræmdu prófin eru merkileg próf fyrir hvern og einn sem að tekur þau en það þýðir ekki að við hin viljum vita allt um þau og gengi fólks í prófunum. Þvert á móti. Mér þætti þægilegast ef þessar samræmdu gelgjur gætu deilt einhverju lokuðu spjallborði þar sem það gæti fengið útrás og uppreisn æru gagnvart hvort öðru. Löngum hefur það víst verið vinsælt að besservissera hvort annað eftir próf. Ég vill hins vegar ekki sjá neinn vott af slíku. Ég hef nú þegar verið samræmdur og tilheyrir það fortíðinni er ég tók sjálfur þessi próf, hvers vegna ætti ég að þurfa að þola þetta allt saman óbeint aftur?