Það er þessi eilífi barningur sem við öll þurfum á að halda sem setti mig í þá stöðu að hefja leit að föstu skrifborði þar sem ég fengi borgað fyrir að sitja hjá og passa annars lagið. Næst á dagskrá er að koma íslendings - hringrásinni í sinn rétta farveg.<br /> <br /> Eignast pening -> eyða pening -> eignast pening -> eyða pening<br />
Þau ykkar sem fylgjast með (og muna) hvað aðrir gera og starfa í lífinu muna kannski eftir hvað ég var að gera í sumar. Að sýna ferðalöngum grjót og kalla það tröll, sýna vatn og kalla það gimstein, sýna læk og kalla hann foss, sýna hver og kalla það sögulegt mannvirki, sýna poll og kalla það laug, sýna hús og allt í einu heyra að það á sér merkilega sögu sem enginn hafði sagt manni áður. Það er oft skrýtið hve margt fer hreinlega framhjá manni ef ekki eru með manni túristar sem allt vilja sjá og skoða.
Upplifa það að úti á miðri hraunbreiðu, þar sem ekkert er fyrir meðal Íslendinginn að sjá, er beðið sérstaklega um að stoppa til að taka myndir af öllum þeim undrum sem eru allt í kringum veginn. Sjá rollu, hest eða belju og allir farþegar verða uppveðraðir að sjá að ég tali nú ekki um að fá að koma nálægt þessum fallegu skepnum.
Eftir tvo hringi um landið þar sem einn sýnilegur lundi á flugi hátt yfir höfðum viðstaddra vakti jafn mikla lukku í Reynishverfi og 86.000 lundar í Borgarfirði Eystri þá finnst manni einhvernvegin maður jú hljóta að vera gríðarlega heppin að búa á Klakanum og veröldin stóra sé innihaldslítil og rýr í samanburði við Ísland.
Jæja nóg um það í bili, ég er semsagt sestur bakvið skenk og í vetur kem ég þar til með að dæma dauða hluti virka, bilaða eða ónýta í boði Ríkisins. Gera vonandi nokkur kraftaverk, bjarga breyta, bæta og finna orsakir þess að hitt og þetta virki ekki eins og vera ber. Eftir að hafa varið nokkrum tímum í kynningu á viðfansefninu líst mér afar vel á og vona að lengi verði þetta söfnunarstaður meginþorra Mammonshlutarins sem nútíminn krefst af hverjum og einum.
Allan veturinn hef ég siðan til að dreyma um ókönnuð landsvæði. Þrátt fyrir að hafa fækkað óheimsóttum stöðum um nokkra tugi þá hef ég síður en svo
áhyggjur af því að hafa séð "allt" það er nefnilega ennþá langur listi af merkilegum og fallegum stöðum sem enn hafa ekki orðið á vegi mínum, örfáir staðir á vestfjörðum en þá aðallega á hálendinu eins og Kjölur, Sprengisandur, svæðin norðan Fjallabaksleiða og stór svæði sunnan og vestan Möðrudalsöræfa. Verða þessi svæði vonandi bráðlega fyrir fótum mínum að einhverjum hluta.
Í stuttu máli sagt, allt fínt og bjart.
Mikið var þetta nú fínn pistill B.Ewing minn. Ertu orðin góði hirðirinn eða hvað. Gangi þér vel vinur.
Hvernig væri að gefa sjálfum ykkur klapp, Það lærist ekki að skrifa svona vandað nema að lesa verk meistaranna fyrst. [klappar]
Aha, mikið áttu gott að fá að leiðsegja útlendingum allt sumarið. Ég er sjálf að vinna í því að fá að gera það næsta sumar.
Grobba mig af fallegasta hluta landsins við erlenda gesti, fabúlera nokkrar sögulegar heimilidir og endurskíra nokkrar fuglategundir.
Tjaldur verður Súla og Teista verður Tjaldsúla [glottir]