Bara smálína í próflestrinum til að sýna að ég er ekki búin að gleyma ykkur....

Í gær var gert samsæri sem beindist gegn undirstöðum keisaradæmisins. Óþokkanna er enn leitað en þeir munu finnast og verða teknir af lífi.

Nánar tiltekið þá lak loft úr keisaraynjubifreiðinni (Hákon tímir ekki að splæsa nýjum Jagúar á mig). Ástæðan var sú að það var nagli í dekkinu. Það leikur enginn vafi á því að óprúttnir náungar sem vilja stöðva framgang keisaraveldisins hafa komið því þar fyrir.

Þar sem ekillinn var í fríi (reyndar ekki hægt að segja að hann sé að sinna starfi sínu sérlega vel) neyddist keisaraynjan sjálf til að aka drossíunni að næsta hjólbarðaverkstæði.

Það er stíll yfir drossíunni þegar drepið er á henni - þá rýkur tígulega úr húddinu og indælis olíuilmur stígur upp í loftið .(Heittelskaður hefur sko engar áhyggjur af þessu né nennu til að gera eitthvað í málunum). Þetta vekur auðvitað aðdáun og hrifningu viðstaddra hvar sem bifreiðin fer. Var hjólbarðaverkstæðið þar engin undantekning.

Ekki hafði keisaraynjan dvalist lengi þarna þegar að henni kom ungur piltur og var meira en til í að gefa henni ókeypis ráðleggingar um meðhöndlun kaggans. Keisarynjunni - eins og öðrum besserwisserum - er þannig farið að skynsamlegar ráðleggingar eru eitur í hennar beinum. ,,Ekki reykja - það er óhollt" - ,,Uhumm, prófaðu að nota getnaðarvarnir - þá verðurðu ekki ólétt" ,,keyrðu vírusvörn á tölvunni og hafðu meira en 20mb laus" o.s.frv. eru dæmi um skynsamlegar ráðleggingar sem hún lætur sem vind um eyru þjóta....

Hún veit þetta allt. Það er bara ekkert sérlega gaman eða gefandi að vera skynsamur alltaf.

Þarna kom semsagt þessi indæli piltur og sagði keisaraynjunni að sjálfrennireiðin mundi nú sennilega bara bræða úr sér og heddpakkningin fara til fjandans ef ekki yrði skipt um vatnskassa hið snarasta... Ja, fussumsvei!

Hin tigna kona þaggaði nú reyndar snarlega niðrí honum með því að tilkynna að hún hefði ekki efni á að fara til tannlæknis þessa dagana og sæi fram á að þurfa að stunda vændi til að eiga fyrir jólagjöfum handa sínum nánustu. Vatnkassi á keisarabílinn væri bara ekki efst á forgangslista....

Ef fólk vill ráð - biður það þá ekki bara um þau ?
Hættum að vera svona skynsöm og dreifa skynsemi okkar eins og kvefbakteríu yfir meðbræður okkar og systur !

Fyrirgefið ef ég er neikvæð en það fer illa með augun að horfa bara í birtuna.

Lifið heil.