Nú gaf ég mig á tal við einstakling af mjúkara kyninu í gærkvöldi og reyndi að koma vilja mínum fram við hana. Kom fljótlega í ljós að hún var ekki að "fíla" svartklædda menn. Fleiri stelpur komu með þessa sömu athugasemd. Var mér einnig bent á að hjálmurinn gerði mig fjarlægan og kaldan í samskiptum og þótti það óaðlaðandi.

Ég útskýrði góðlátlega fyrir þeim að ég gæti murkað lífið úr þeim með hugarafli því sem kóbalthjálmurinn gæfi mér og hafði það áhrif til betri vegar. Það má samt sem áður segja í framhaldi af því að þessi búningur er ekki hentugur til náinna samskipta en mér er illa við að taka hann af mér því ég er orðinn háður lífstuðningstækjunum. Sjálfstæð öndun er eitthvað svo mikið í gær.