Frumraun Sinfóníuhljómsveitar áhugamanna í Hörpu
Þann 25. marz næstkomandi, klukkan fimm eftir hádegi, mun Sinfóníuhljómsveit áhugamanna leika í Hörpu, tónleikahúsi Reykjavíkur, í fyrsta skipti. Leikið verður í Norðurljósa-sal hússins og eru því til sæti fyrir 450.
Miðaverð er 2500kr. á gagnabæli Hörpu, en 1500kr. ef bókað er gegnum oss fyrir þriðjudaginn næsta (20. marz). Einnig er afsláttarverð, 1500kr., í boði fyrir eldri borgara og námsmenn, en þeir þurfa þá að kaupa miðann í Hörpu.Selt er í ónúmeruð sæti, svo fýsilegast er, að mæta snemma, og tryggja sér gott pláss.
Efnisskráin verður eigi annað en stórglæsileg. Fyrir hlé verður leikin Kirjála-svíta Jens af Síbylju og Glæsileiki eftir Pétur Trjáskegg, en eftir hlé er á skránni Tónleikaverk fyrir fjögur horn úr smiðju Hróbjarts Skómanns.
(Fyrir þá, er í einhverjum erfiðleikum eiga með að skilja oss, þá er hér átt við eftirfarandi:
Karelia-suite e. Janne Sibelius
Elegie e. Piotr Tschaikovski
Konzertstück f. 4 Hörner e. Robert Schumann)
Er það vor von, að sem fleztir sjái sér fært að mæta. Munum vér hér gefa upp allar þær nánari upplýsingar, er óskað verður eftir.
Ps. Fimm stjörnur af fimm gefum vér fyrir fram, því vér höfum heyrt efnisskrána leikna af þessari sveit.
Svo er, og mun hægt að sjá oss sitjandi stjórnanda til hægri handar. Óvíst er þó enn, hvort vér verðum nær eður fjær áhorfendum að þessu sinni.
Undanfarið hefur tónleikastaður verið Seltjarnarneskirkja, en enginn gat neitað, er boð gafst um pláss í Hörpu.
Vér viljum vekja athygli á því, að nú eru seinustu forvöð að tryggja sér miða á þessa tónleika með forsöluafslætti. Áhugasamir hafi samband við oss með einkapósti, tölvupósti eður símleiðis.
Forsala er opin hjá oss til 19:00. Munið, ef þér viljið miða, að taka fram, hvernig þér viljið nálgast þá.
Fyrir einskæra tilviljun féll oss í skaut aukreitis miði á tónleikana. Býðst hann fyrstbjóðanda.