Serenity er um margt óvenjuleg kvikmynd. Hún er byggð á sjónvarpsþætti, sem er kannski ekkert svo óvenjulegt, en hún er byggð á sjónvarpsþætti sem var með lítið áhorf og var tekinn af dagskrá eftir að 11 þættir höfðu verið sýndir í kolvitlausri röð (þrátt fyrir að 14 þættir væru framleiddir). Sem sýnir enn og aftur hvað sjónvarpsstjórnendur í Ammríku eru vitlausir, þættirnir voru gefnir út á DVD og rokseldust og eru algjört költ hit, enda er það enginn annar en snillingurinn Joss Whedon sem gerði þá.
Nú ætla ég að viðurkenna það fyrir lesendum að ég er Joss Whedon nörd. Ég get vitnað í nánast öll hans verk, ég á seríur af sjónvarpsþáttunum hans á DVD og ég veit meira um hann og heimana sem hann skapar en þægilegt er! Fyrir þá sem ekki vita er Joss Whedon einna þekktastur fyrir að hafa búið til kvikmyndina og sjónvarpsþættina Buffy the Vampire Slayer og út frá því þættina um Angel (sem er spin-off af Buffy) en á tímabili var hann með 3 þætti í framleiðslu, BtVS, Angel og svo Firefly sem myndin Serenity er byggð á. Firefly sagði sögu úr framtíðinni, þegar mannkynið er orðið of fjölmennt fyrir jörðina og heldur út í geim í leit að nýjum heimkynnum. Til verður samfélag pláneta, á innri plánetunum er siðmenning og tæknivætt líf með öllum helstu nauðsynjum og munaði en á ytri plánetum og tunglum er líf fólks fábrotnara og minnir um margt á landnematímabilið í Ameríku, enda er það líka ætlun Joss. Kvikmyndin hefst nokkrum mánuðum eftir að þættirnir enda og er í raun beint framhald af þáttunum. Söguhetjur myndarinnar eru áhöfnin á geimskipinu Serenity sem flýgur á milli pláneta og tekur að sér öll þau verkefni sem þau geta, þótt þau séu kannski ekki algjörlega lögleg. Þau hafa tekið um borð tvo farþega, lækni og systur hans sem eru á flótta undan The Allience (sem er löggæsluvaldið á innri plánetunum) og verður það til þess að áhöfnin þarf að taka ákvörðun um hvort þau vilji halda áfram að gera það sem þau gerðu áður eða berjast við The Allience fyrir lífi og limum systkinanna. Og annarra. Ég ætla ekkert að rekja meira af söguþræðinum en sagan er frábær, vel sögð og það tekst mjög vel að kynna persónur og heiminn fyrir fólki sem hefur aldrei séð Firefly. Aðalleikarar eru þeir sömu og léku í þáttunum og maður finnur alveg að þeim líður vel í sínum hlutverkum. Joss leikstýrir sjálfur og maður sér hans handbragð á ýmsu, hann er mjög mikið gefinn fyrir langar tökur og ýmislegt óvenjulegt sem maður tekur yfirleitt ekki eftir fyrr en við annað eða þriðja áhorf.
Ástæðan fyrir því að ég segi að þetta sé Star Wars fyrir nýja kynslóð er sú að þetta er (að mínu mati alla vega!) besta sci-fi mynd en hefur komið fram lengi. Það eru ekki yfirþyrmandi tæknibrellur í henni (en þær brellur sem eru í myndinni eru ótrúlega flottar) og það er miklu mannlegra element í henni en í flestum öðrum sci-fi/geim myndum síðustu ára. Ef þú trúir mér ekki, verðurðu bara að sjá hana sjálfur. Best er náttúrulega að sjá þættina fyrst (þeir ættu að vera til í Laugarásvídeói, annars verð ég bara að lána þér þá!) en það er alls ekkert möst, aðalatriðið er að þetta er góð mynd, þú getur gert ýmislegt verra við tvo og hálfan klukkutíma í lífi þínu en að eyða þeim í bíó á Serenity.
Fimm stjörnur, takk fyrir mig Joss!