Frétt — Spesi — 1. 11. 2001
Íslenskur blaðamaður veginn á Ítalíu
Íslandsvinurinn don Gianluigi

Hagsmunaráð borgarinnar Palermo á Sikiley, Interesti Nostri, hefur ákveðið að láta myrða íslenska blaðamanninn Fárnýju Nönnu Diðryksdóttur fyrir grein sem hún skrifaði eftir heimsókn til Palermo. Samkvæmt upplýsingum forstöðumanns ráðsins, Don Gianluigi Sampiero, verður Álfheiður Hanna drepin fyrir grein sem hún skrifaði eftir tólf daga dvöl í Palermo og birt var í Morgunblaðinu en í greininni þykir henni hafa tekist að draga upp mjög sanna mynd af íbúum og menningu Palermo. "Hún veit hreinlega of mikið", sagði Don Gianluigi sposkur á svip. "Við höfum rætt við íslenska sendiráðið og þar á bæ fullvissuðu menn okkur um að þetta mun ekki valda neinum brestum í milliríkjsamstarfinu", bætti hann við og saug upp í nefið.

Fárný Nanna verður líflátin við hátíðlega athöfn í fornu klaustri í Palermo 17. nóvember. Fyrr um kvöldið mun hún halda banjótónleika á vegum stofnunarinnar Arte' Muerta.

Fuglaflensulyf!

Á fyrirliggjandi mikið magn af heimagerðu lyfi við fuglaflensu. Hefur reynst vel gegn rjúpnakvefi og gaukssleni. A.v.á.

Lesbók22. 10. 2020 — Enter

Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.

Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:


  • Ekkert starfsfólk
  • Engin viðvera
  • Ekkert húsnæði
  • Engin þjónusta
  • Engin gildi
  • Engin frí
  • Engin áhætta
  • Ekkert internetsamband
  • Enginn samningsvilji
  • Engin kaffivél

Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.

Góðar stundir.

 
Frétt — Númi Fannsker — 31. 10. 2001
Krafa um að viðskiptavinir Smáralindar tali íslensku
Nemendur ásamt kennara sínum

Sú krafa hefir nú verið gerð af leynilögreglu Smáralindar, að viðskiptavinir verslunarmiðstöðvarinnar tali óaðfinnanlega íslensku. Viðskiptavinir munu þreyta íslenskupróf við innganginn og í kjölfarið verða "tossarnir" sendir á þriggja vikna námskeið. Þeir sem ná 8.5 á stafsetningarprófi fá hinsvegar inngöngu, að því tilskildu að þeir nái sömu einkunn í hljóðfræði- og merkingarfræðiprófum. Að sögn Adolfs Guðmundssonar, yfirmanns leyniþjónustu Smáralindar (SS Íslands ehf.) og formanns átaksverkefnisins "hreint land - fagurt land", er krafa þessi gerð af illri nauðsyn: "Við tókum eftir því að þágufallssýki var veruleg meðal viðskiptavina okkar, auk þess sem nokkuð bar á eignarfallsflótta. Eitthvað hefir einnig borið á útlendingum í húsinu, sem við viljum eðlilega uppræta. Við getum einfaldlega ekki boðið starfsfólki okkar upp á þvílíkt ástand". Að sögn Adolfs skulu viðskiptavinir einnig bera á sér löggild skilríki og vera reiðubúnir að framvísa þeim, hvar sem þeir eru staddir.

Frétt — Númi Fannsker — 30. 10. 2001
Egill Helgason valinn
Er Egill að meikaða?

Hársápuframleiðandinn Wella tilkynnti í dag að sjónvarpsmaðurinn og kyntáknið Egill Helgason, hefði verið valinn Wellaandlit ársins. Egill mun kynna nýja línu fyrirtækisins "Curl and Blow" sem er væntanleg á markað snemma á næsta ári. "Ég sendi þeim nokkrar myndir af mér í gegnum Módelsamtökin fyrir nokkrum árum og þeim leist svona vel á þetta. Fyrst um sinn mun ég eingöngu koma fram í sjónvarps- og útvarpsauglýsingum til að kynna vöruna en í framtíðinni er hugmyndin sú að ég taki þátt í tískusýningum og sölusýningum víðsvegar um heiminn. Ég er ýkt spenntur, enda lengi verið draumur minn að vinna sem fyrirsæta, eða allt síðan ég gekk til liðs við Módelsamtökin árið 1982", sagði Egill.

Frétt — Enter — 30. 10. 2001
Fölsuð mjólk
Hluti fölsuðu vörunnar

Lögreglan í Hafnarfirði gerði í dag upptæka 14.000 lítra af falsaðri mjólk, sem fannst í vöruhúsi nálægt kvartmílubrautinni.

"Um var að ræða 10.000 lítra af geita- og kindamjólk og eitthvað af öðrum mjólkurvörum - allt mjög vel gert, greinilega fagmenn að verki."

Grunsemdir vöknuðu hjá starfsmanni matvöruverslunar þegar honum barst sending af mjólk. Svo virðist sem falsararnir hafi ætlað sér um of þegar þeir útbjuggu falsaðar einslítraumbúðir fyrir rjóma. "Mér fannst þetta dálítið grunsamlegt, auk þess sem dálítið var um stafsetningarvillur á fernunum, en MS er sem kunnugt er með dálítið málverndarátak," sagði Hermar Vilhjálmsson, tómatsósuraðari og íslenskufræðingur í samtali við Baggalút.

Málið telst upplýst.

Tilkynning frá Stofnun Árna Magnússonar í íslenskum fræðum

Í anda þess þegar Bandaríkjastjórn breytti nafni franskra kartaflna í "Frelsiskartöflur" hefur nú verið ákveðið að enskur morgunverður skuli héðan í frá heita "Skítalabbatjallaógeðiskornflex"

Frétt — Enter — 30. 10. 2001
Atli tilbúinn í slaginn
Atli og dr. Hress í tjáningartíma

Atli Eðvaldsson skrifaði í dag undir samning við KSÍ um að hann verði landsliðsþjálfari til ársins 2004, eða fram yfir undankeppni Evrópumótsins í knattspyrnu. Ætti það að tryggja að fjárútlát til utanlandsferða liðsins verði í lágmarki því lagt er upp með að liðið tapi öllum leikjum á tímabilinu.

Atli sagðist vel í stakk búinn að halda áfram með liðinu, en hann hefur undanfarið hlotið leiðsögn í raddbeitingu og stjórntækni hjá þekktum austurískum málara sem rekur lítið heilsuhæli, "Dr. Hress' Gesellschaft für Gesundheitswissenschaften" skammt austur af Vín.

Frétt — Númi Fannsker — 29. 10. 2001
Allrasíðasti Móhíkaninn fundinn
Bjarni Móhíkani

Svo virðist sem einhvers misskilnings hafi gætt um afdrif Móhíkanaættbálksins, sem heilu bækurnar hafa verið skrifaðar um. Í sumum frásagnanna af bálki þessum hefur því verið lýst hvurnig síðasti Móhíkaninn geispaði golunni vestur í Ameríku.

Nú hafa ættfræðingarnir og bræðurnir Örn og Örlygur Einarssynir svipt hulunni af raunverulegum afdrifum ættbálksins. Samkvæmt rannsóknum þeirra fluttist Móhíkanafjölskylda til Íslands um aldamótin 1800. Þeim var þá gert að skipta um nöfn, sem þau gerðu og tóku upp nöfnin: Bjarni, Þuríður og Ásmundur. Þau settust að í V-Húnavatnssýslu og aðlöguðust allfjótt íslensku samfélagi og menningu. Afkomandi þeirra er Bjarni Bjarnason (oft nefndur Móhíkani), pípulagningameistari úr Hveragerði, og mun hann vera síðasti Móhíkaninn skv. þeim Erni og Örlygi:
"Með hjálp ættfræðiforritsins Grjóna hefir okkur tekist að hafa upp á allrasíðasta Móhíkananum. Við fengum reyndar hugmyndina þegar við sáum mynd af Bjarna, þar sem ættareinkennið leyndi sér ekki, en þetta sérkennilega skallaafbrigði er aðeins að finna hjá Móhíkönum".

Bjarni hefur verið lítið upp á kvenhöndina í gegnum tíðina og á því enga afkomendur, hann hyggst þó leita réttar síns og endurheimta veiðilendur forfeðra sinna í Húnavatnssýslunni, "sem hvíti maðurinn sölsaði undir sig, en þar voru Danir í fararbroddi", segir Bjarni Bjarnason, allrasíðasti Móhíkaninn.

Frétt — Enter — 29. 10. 2001
Scramban falsaður?
Falsað verk

Umfreður Kristjánsson forvörður sagði í gær að málverk, sem sagt var eftir Rafn Th. Scramban málara og selt sem slíkt á vegum Gallerís Lakkrís árið 1997, væri greinilega ekki eftir listamanninn. Verkið var ágreiningsefni í "Klessumálinu" svokallaða, meiðyrðamáli sem eigendur Gallerís Lakkrís unnu gegn blaðamanni Baggalúts, sem dregið hafði í efa að málverkið væri eftir Scramban.

Þetta sagðist Umfreður geta fullyrt eftir að hafa skoðað málverkið. Sagði hann greinilegt að hér væri um ljósrit að ræða og það fremur lélegt.

Starfsmenn Gallerís Lakkrís vildu fátt um málið segja, en sögðust þó hafa haldbærar sannanir fyrir því að Scramban hefði ljósritað verkið sjálfur og því væri það tæknilega séð hans höfundarverk.

Prestar!

Terlínhempur, terlínkragar, terlínskikkjur, terlínkuflar.
Terlín & Guð - Laugavegi

Frétt — Enter — 28. 10. 2001
Sóðaskapur
Landsmenn gera sitt besta til að taka til, en það gengur erfiðlega

Undanfarið hefur nokkuð borið á því að allskyns drasli sé fleygt úr flugvélum sem fljúga yfir Afganistan (sem er fjölmennt ríki í Asíu). Í samtali við Baggalút sagði Ibn Sigfússon: "Þetta hófst fyrir u.þ.b. mánuði, en flugumferð hefur aukist gríðarlega yfir landinu síðan - sennilega vegna einhverra nýrra samninga. Svo virðist sem þetta fólk líti á landið sem einhvers konar ruslakistu - við erum að finna matarleifar og alls kyns óþverra í gulum ruslapokum út um allt. Þetta er náttúrulega óþolandi."

Ibn taldi jafnvel að einhverjar skemmdir hefðu orðið á mannvirkjum vegna þessa, en efaðist um að slys hefðu orðið á mönnum. "...engu að síður verður þessu að linna, þurfum við að bíða eftir því að einhver slasi sig til að mennirnir sjái að sér?"

Frétt — Enter — 25. 10. 2001
Vandi smábátaflotans leystur?
Skip að veiðum á Tjörninni

Sjávarútvegsráðherra hefur gefið út yfirlýsingu þess efnis að kvótalitlum smábátum sé heimilt að veiða utan kvóta í Reykjavíkurtjörn.

Nokkrir smábátaeigendur gripu tækifærinu fagnandi og hófu veiðar þegar í stað. "Þetta er búið að vera helvíti lélegt í dag, bræla og leiðindi, en við erum bjartsýnir og munum reyna annars staðar á svæðinu strax í fyrramálið," sagði Ellert Hergrímsson, sem hóf veiðar upp úr hádegi í dag.

Aðspurður um hvort einhvern fisk sé að hafa í tjörninni sagði Árni M. Mathiesen: "Við höfum sterkar vísbendingar um góðan árgang af marfló á svæðinu." Þess má geta að Hafrannsóknastofnun vinnur nú að skýrslu um svæðið en það hefur fram að þessu verið lítið nýtt til veiða.

"...svo er aldrei að vita nema við sleppum nokkrum laxaseiðum útí, svona fyrir jólin," bætti Árni við sposkur á svip.

Frétt — Kaktuz — 25. 10. 2001
Bavíani verður stórmeistari í skák
Gólan í stuði.

Einstakur atburður átti sér stað í síðasta mánuði þegar afrískur bavíani að nafni Gólan sigraði á sterku skákmóti í Vín í Austurríki. Með sigrinum uppfyllti hann skilyrði Alþjóða skáksambandsins fyrir stórmeistaratitli. Gólan sigraði í öllum skákum sínum og var með langflesta vinninga að keppni lokinni.

Aðspurður sagði fjölmiðlafulltrúi Sambandsins að árangur Gólans sýndi enn og aftur að skákíþróttin væri opin öllum vitsmunaverum, en stutt er síðan konur fóru að hasla sér völl á þeim vettvangi.

Ekki eru þó allir jafn ánægðir með árangur Gólans. Ónefndur stórmeistari sem fréttastofa Baggalúts náði tali af, að afstöðnu mótinu í Austurríki sagði: „Svo virðist sem eigandi apans hafi þjáfað hann til að ráðast á andstæðinga sína reyni þeir að hreyfa við nokkrum manni á borðinu. Enginn keppandi þorði annað en að gefast strax upp ellegar falla á tíma eftir að hafa séð hvernig skrímslið lék fyrsta andstæðing sinn.“

Ekki náðist í Gólan við gerð þessarar fréttar.

Frétt — Spesi — 24. 10. 2001
Af hverju hata þeir okkur?

Bernharð Harðarson heldur í dag fyrirlestur á vegum Háskóla Íslands um heimsmynd Færeyinga í Hátíðarsal, Aðalbyggingu. Þar verður velt upp spurningunni sem brennur mjög á Íslendingum um þessar mundir: "Af hverju hata þeir okkur?" Fjallað verður um hugtakið "spæligleði" og kannað hvernig og í hvaða tilgangi þessu hugtaki var beitt á 20. öld. Þá verður rætt um hvaða leiðir eru fýsilegar til að sporna við frekari hryðjuverkum Færeyinga á íslenskri grund.

        1, 2, 3 ... 380, 381, 382, 383  


§ ÚR SAFNI BAGGALÚTS:
ÚR SAFNI — 12. 1. 2003 — Enter

Donald Rumsfeld, hasarmálaráðherra Bandaríkjanna, staðfesti í dag að árshátíð bandaríska heraflans verði haldin í Baghdad. "..árshátíðarnefndin var þarna á ferð …

»MEIRA

ÚR SAFNI — 20. 5. 2005 — Númi Fannsker

Eggert Hermannsson, nemi, gróf móður sína lifandi í gærkvöldi - að eigin sögn „í djóki“. „Æi - ég …

»MEIRA

ÚR SAFNI — 28. 8. 2009 — Númi Fannsker

Steingrímur J. Sigfússon fjármálaráðherra er afar sáttur við niðurstöðu Alþingis í Icesave-málinu svokallaða. Hann fagnaði að loknum þingfundi í dag …

»MEIRA

LESBÓK — Númi Fannsker — Dagbók
 
LESBÓK — Enter — Dagbók
 
ÚR SAFNI — 23. 5. 2012 — Enter

Tannlæknir á sextugsaldri hefur heitið því að klæða sig ekki fyrr en Ísland hefur sigrað í söngvakeppni evrópskra sjónvarpsstöðva, Eurosision. Raunar …

»MEIRA

ÚR SAFNI — 3. 6. 2005 — Enter

„Jújú, það er víst voða góð lykt af mér,“ sagði Eyvindur Arason, skrifstofumaður, vandræðalegur, en hann þykir ilma einstaklega vel …

»MEIRA

ÚR SAFNI — 25. 1. 2008 — Númi Fannsker

Bóndi ársins 2007 var útnefndur í dag, bóndadag, samkvæmt venju. Fyrir valinu að þessu sinni varð Einar Ingþórsson, konfektaeplabóndi í …

»MEIRA

LESBÓK — Enter — Forystugrein
 
LESBÓK — Númi Fannsker — Dagbók
 
ÚR SAFNI — 31. 1. 2006 — Enter

Hallbjörn Knudsen, nemi, varð að eigin sögn fyrir óvenjulegri lífsreynslu í gær þegar hann gekk fram á 12 metra háan …

»MEIRA

ÚR SAFNI — 21. 1. 2004 — Kaktuz

Þær gleðifréttir bárust frá frændum okkar í Noregi að ríkisarfinn Hákon og hans frjósama spúsa hefðu eignast dóttur. Kemur …

»MEIRA

ÚR SAFNI — 14. 4. 2002 — Enter

Vísindamönnum hefur tekist að færa sönnur á að skrifstofubúnaður, húsgögn og ýmis raftæki geta vaxið og þrifist villt í náttúrunni. Þegar …

»MEIRA