Arnvarður Jónsson, fóstra, leitaði til læknis í dag sökum heiftarlegs kláða í nösum og í skeggi.
"..það mátti ekki tæpara standa," sagði Tumi Grendal náttúrulæknir, sem tók á móti sjúklingnum. "..hér er um að ræða mjög sjaldgæft og skemmtilegt afbrigði frjóofnæmis. Helstu einkennin eru fyrst og fremst þessi mikli kláði, en einnig fylgja þessu litabreytingar í hári, uppköst og mikill svefngalsi."
Hægt er að slá á ofnæmið með því að lauga húðina í gúrkusafa, en ef ekki er brugðist við í tæka tíð festa frjókornin rætur í húð og eru dæmi um að fullvaxta karlmaður geti þannig breyst í runna á fáeinum dögum.
Mótmælendur athugið!
Pottar, pönnur og sleifar úr góðum málmi á lágu verði.
Ikea
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.