Formaður Samfylkingarinnar, Árni Páll Árnason, þverneitar að klára matinn sinn og gefur sig ekki — þrátt fyrir hótanir um að hann fái engan eftirrétt né heldur að horfa á sjónvarpið í heilan mánuð.
Árni Páll vill meina að fyrst enginn annar hafi viljað snerta á matnum, þá þurfi hann ekki að borða hann — auk þess sem hann vill meina að matarleifar geti lent í nýja „fína“ skegginu hans og skemmt „kosningamójóið“.
Samkvæmt heimildum Baggalúts eru matsveinarnir öskureiðir út í Árna og hafa kallað hann „matvandan dekursnúð“ sem hafi belgt sig út af sætindum og gosi fyrir matinn — sem stjórnarandstaðan mun hafa freistað hans með.
Smjattpattar
Eru smjattpattar í garðinum þínum? Bjóðum upp á mikið úrval af gildrum og eitri til að gera útaf við litlu kvikindin. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.